अञ्जु पन्त आगामी भदौ २४ गते ‘एकल साँझ’ मा प्रस्तुत हुँदैछिन् पहिलोपल्ट । तर, त्यो दिन अर्को कुनै एकल साँझको झल्को मिसिनेछ उनको स्मृतिमा । सफलता र खुसीको यो मञ्चले उनलाई आफ्नै जिन्दगीको संघर्षपूर्ण अर्को मञ्च सम्झाउनेछ।
अञ्जुलाई समयले एक चक्कर काटेर यो ठाउँमा ल्याइपुर्याएको छ । कुनै दिन अरुको एकल साँझका लागि चार दिनकी छोरी रुवाएर मञ्चमा उक्लेकी थिइन् । तिनै छोरी परितोषिका भदौ २४ गते दर्शकदीर्घाको अघिल्लो पंक्तिबाट हर्षले ताली बजाइरहेकी देखिनेछिन्।
२०५९ सालमा भएको फत्तेमान साँझमा उनी चार दिनको सुत्केरी अवस्थामा स्टेज चढेकी थिइन् । भन्छिन्, ‘अभाव पूरा गर्न र अवसर छोप्न त्यो बेला पीडा सहेरै गाएकी थिएँ । सुत्केरीमा स्याहार नपुगेका कारण मेरो जिउ अहिले पनि झरीबर्खामा दुख्छ।’
उनको जीवनको कष्टदायी त्यो साँझ गायनको सुन्दर मोड पनि थियो। त्यो दिन गीत सुनेर संगीतकार रञ्जित गजमेरले घरमै पुगेर उनलाई संगीत सिकाए, फिल्मका गीतमा स्वर भर्ने अवसर दिलाए।
दस वर्षदेखि सर्वाधिक सुनिएकी गायिका अञ्जुले यो अवस्थामा आइपुग्न धेरै असहजताका काँडासँग पौँठेजोरी खेलेकी छिन्।
कहिलेदेखि गीत गाउन थालेँ भन्ने उनलाई याद छैन। सानै उमेरमा रेडियोमा सुनेका गीत कापीमा सार्ने र स्वर दुरुस्तै उतार्ने गर्थिन्।
उनी सम्झन्छिन्, ‘रेडियो लिएर कौसीमा जान्थेँ, रेडियो नेपालबाट आउने सबै गीत तत्काल सार्न खोज्थेँ, तर सक्दिनथेँ । एउटै गीत सार्न तीन दिन पनि लाग्थ्यो । तर, म त्यो गीत फेरि कहिले बज्ला भनेर कुरेर बस्थेँ।’
कौसीमा गएर गीत सार्ने, छिँडीमा आएर ‘प्राक्टिस’ गर्ने उनको दैनिकी नै थियो । उनकी फुपू जानकी केसीलाई संगीतप्रतिको उनको लगावले छोएछ। उनले अञ्जुलाई संगीत प्रशिक्षक कृष्णमान डंगोलकहाँ पुर्याइदिइन्। कृष्णमानले अञ्जुको स्वर सुनेपछि भविष्यवाणी गरिदिए, ‘यो नानी नेपाली गायन क्षेत्रमा तारा बन्छे।’
नभन्दै आज अञ्जुको सफलता, चर्चा र स्वरले आकाश चुमेको छ । उनको स्वर धेरैका अन्तरहृदयमा सजिएर बसेको छ नै, ‘देखिने मापदण्ड’ मा पनि उनी पहिलो पंक्तिमै छिन् । देखिने मापदण्ड भन्नाले केही समयअघिको सिआरबिटी, पिआरबिटीमा उनले गाएका गीत सर्वाधिक डाउनलोड हुनेमा पर्थे । त्यो समय ‘न बिर्सें तिमीलाई’ अधिकांशका मोबाइलको रिंगब्याक टोन थियो।
जमाना युट्युबको आएको छ । त्यसमा पनि पहिलोपल्ट करोडपल्ट हेरिएको गीत ठहरियो, उनको स्वरमा सजिएको ‘सुर्केथैली खै’ । फिल्मको पार्श्व गायनमा होस् वा कलेक्सन एल्बममा, सबभन्दा बढी सुनिने नारी स्वर अहिले पनि अञ्जुकै हो।
नेपालमा आयोजना हुने प्रायः अवार्ड र सम्मान पाइसकेकी उनले हालसालै इन्टरनेसनल आर्टिस्ट सोसाइटी (इनास अमेरिका) को सम्मान थापिन् । भर्जिनिया राज्यका हाउस अफ डेलिगेट्स जोन जो बेलले गायिका पन्तलाई सम्मान गरेका थिए ।
अञ्जुले सबै प्रकारका गीत गाएकी छिन् । तर, आरोप लाग्ने गर्छ– ‘अञ्जु पन्त दुःखका गीत बढी गाउँछिन्।’
‘म दुःखका भन्दा पनि दुःखीका गीत गाउँछु । एक हिसाबले म दुःखीहरूप्रति समर्पित छु’, अञ्जुको उत्तर छ।
यसपल्ट पनि मञ्चमा आफ्ना लागि होइन, उनी अरुकै लागि उक्लिन लागेकी हुन् । रेकर्डिस्ट एसोसिएसन र अञ्जु पन्त फाउन्डेसनको सहयोगार्थ गाउनेछिन् । एकल साँझबाट उठेको रकम अनाथ र असहायको पढाइमा खर्च गर्ने उनको धोको छ।
उनी भन्छिन्, ‘यसअघि १५ लाख रुपैयाँसम्म दिएर एकल साँझ गरौं भनेर अफर आएको थियो, तर गरिएन । यसपल्ट सहयोगका लागि भएकाले गर्न लागेकी हुँ।’
अञ्जु धेरै श्रोताले रुचाएकी गायिका त हुँदै हुन्, संगीतकार र गीतकारले पनि उनको स्वर त्यत्तिकै रुचाउँछन् । त्यसैले त संगीतकार पनि एउटा गीत भए पनि उनीसँग ‘डोयट’ गाउँछन् । उनले अघिल्लो पुस्ताका लोकप्रिय गायक/संगीतकार फत्तेमानदेखि अहिलेका चर्चित महेश खड्का, राजनराज शिवाकोटी र अर्जुन पोखरेल लगायतसँग पनि गाएकी छिन्।
अञ्जुका ‘सुर्केथैली खै’, ‘सागरसरि चोखो माया’, ‘तिर्खा लाग्यो पानी खाएँ’ जस्ता रोमान्टिक गीत चर्चित छन् । तर, उनको ‘न बिर्सें तिमीलाई’, ‘जिन्दगी यो फूलैफूलको थुङ्गो हुँदैन’ धेरै सुनिइन्छ ।
यसपल्ट एकल साँझमा उनले झन्डै डेढ दर्जन गीत गाउनेछिन् । अग्रज सर्जकहरु फत्तेमान, रञ्जित गजमेरदेखि अहिले चल्तीका एकनारायण भण्डारी, राजनराज शिवाकोटी, अर्जुन पोखरेलसम्मका गीत गाउनेछिन् ।
धेरै गीत चर्चित हुनुको एउटा धर्मसंकट भने आइलागेको छ यतिबेला । उनी भन्छिन्, ‘गीत छान्ने काम रेकर्डिस्ट सोसाइटीले गरेको छ । तर, सबैलाई समेट्ने कोसिस गर्दागर्दै पनि कति छुटेका छन् । मेरो गीत गाइदिएन भनेर चित्त दुखाउनुहुन्छ कि भन्ने डर लागिरहेको छ।’
अचेल युट्युबमा उनले हिन्दी गीत ‘तुझसे नाराज नही’ को कभरको सर्वत्र तारिफ भइरहेको छ । यसले उनलाई अन्तर्राष्ट्रिय स्तरमा पनि पहिचान दिलाउने सम्भावनाको ढोका खोलेको छ।
यो कभर गाएपछि केही दिनअघि मात्रै बंगलादेशबाट एउटा टोली उनलाई खोज्दै नेपाल आइपुगेको थियो । उनको स्वरमा गीत रेकर्ड गराएर फर्कियो।
‘तपाईंको स्वर आशा ताइ (आशा भोस्ले) को जस्तै मीठो सुनिएको छ,’ उनीहरुको प्रतिक्रिया सुनाइन्।
अञ्जुको एकल साँझ उनका धेरै प्रशंसकको लागि प्रतीक्षाको उत्सव हो । त्यसैले उक्त साँझ जम्नेमा कुनै शंका छैन । अञ्जुको मखमली स्वरले सजिने भदौ २४ को साँझमा उनले गर्न चाहेको सहयोगको हिस्सेदार बन्न पनि धेरै जना सहभागी हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
