काठमाडौं- नेपाल वायुसेवा निगमले ल्याएका २ वटा वाइडबडी विमान खरिद प्रकरणमा छानबिन गर्ने विवेकशील साझा पार्टीले अख्तियार दुरुपयोग अनुसन्धानमा आयोगमा उजुरी दिएको छ।
आइतबार सो पार्टीले लिखित रुपमा उजुरी गरी वाइडबडी विमान खरिद प्रकरणको अविलम्ब अनुसन्धान गरी सो प्रकरणमा जोडिएका सबै व्यक्ति तथा निकायमाथि कारबाहीको माग गरेको हो।
पार्टीका संयोजक उज्वल थापा तथा अभियान विभाग प्रमुख रन्जु दर्शनासहितको टोलीले आयोगमा उजुरीपत्र दर्ता गराउनुका साथै आयोगका प्रवक्ता सहसचिव रामेश्वर दंगालसंग भेटी तत्काल प्रभावकारी छानबिन अघि बढाउन आग्रह गरेको हो।
उजुरीपत्रमा नेपालको संविधान तथा प्रचलित नियम कानून बमोजिम अख्तियारलाई प्रत्यायोजन गरिएको अधिकार उपयोग गरी छानबिन गर्न आग्रह गरिएको छ।
अनुसन्धानका लागि आवश्यक परे विमान खरिद निर्णयमा संलग्न नेपाल वायुसेवा निगमको सञ्चालक समिति, महाप्रबन्धक लगायत अन्य उच्च पदस्थ कर्मचारीहरु, निगमको तालुकवाला मन्त्रालयका जिम्मेवार राजनीतिक तथा प्रशासनिक नेतृत्वविरुद्ध उनीहरुको दोष अनुरुप मुद्दा अभियोजन गर्न माग गरिएको छ।
पार्टीको टोलीसंगको भेटमा आयोग प्रवक्ता दंगालले वाइडबडी खरिद प्रकरणमा भ्रष्टाचार भएको भन्नेबारे आयोगले छानविन अघि बढाइसकेको बताए।
विवेकशील साझा पार्टीका संयोजक थापाले सार्वजनिक सरोकारका यस्ता गम्भीर मुद्दाका स्वतन्त्र तथा प्रभावकारी छानबिनका लागि पार्टीले आवश्यक सहयोग गर्नुका साथै दबाबमूलक अभियान सञ्चालन गर्ने उल्लेख गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
