चितवन (रासस) - माडी क्षेत्रमा हिंस्रक बनेको जङ्गली हात्ती नियन्त्रणका लागि गएराति गरिएको प्रयास असफल भएको छ । निकुञ्जका प्राविधिकले माडी नगरपालिका–९ कान्छिवगइमा सो हात्तीलाई नियन्त्रणमा लिनका लागि डार्ट गरेका थिए ।
चितवन राष्ट्रिय निकुञ्जका पशु स्वास्थ्य प्राविधिक पुरुषोत्तम पाण्डेका अनुसार राति ११ः ३५ बजे स्थानीय एक घरमा मकै खाँदै गर्दा हात्तीलाई डार्ट गरिएकामा त्यसको असर नपरेको हो । उनका अनुसार हात्ती विस्तारै हिँड्ने गरी ‘जाइलाजीर’ नामक औषधि राखेर डार्ट राखिएको थियो । तर त्यसले काम नगरेको र हात्ती भागेर निकुञ्ज पसेको उनले बताए।
सो क्षेत्रमा खोलानाला र अफ्ठ्यारो ठाउँ भएकाले ढल्ने गरी नभएर विस्तारै हिँड्नसक्ने बनाउने गरी डार्टको तयारी गरिएको थियो । सोका लागि प्राविधिकसहित ३५ जनाको टोली शुक्रबार साँझ माडी क्षेत्रमा परिचालन भएको थियो ।
निकुञ्जका प्रमुख संरक्षण अधिकृत वेदकुमार ढकालका अनुसार हात्तीलाई विस्तारै हिँड्ने बनाएर सम्म ठाउँमा पुनः बेहोसका लागि डार्ट गर्ने र बेहोश भएपछि दाह्रा काटेर, रेडियोकलर जडान गरी छाड्न निर्देशन दिइएको छ ।
रेडियोकलर जडानसँगै हात्तीको अनुगमन गर्ने र त्यति गर्दा पनि हिंस्रक भइरहेमा मार्ने योजना रहेको छ । सो हात्तीले बुधबार स्थानीय दुई महिलालाई आक्रमण गरी मारेको थियो । यसअघि हात्तीले गएको दशैँतिर पनि एक बालकलाई आक्रमण गरी ज्यान लिएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
