काठमाडौं। बाढी, पहिरो तथा सडक कटानका कारण रसुवा, मनाङ, म्याग्दी, हुम्ला र ललितपुरका विभिन्न सडकखण्ड पूर्ण रूपमा अवरुद्ध भएका छन्। प्रहरीका अनुसार केही सडकखण्डमा वैकल्पिक मार्गबाट आवतजावत गर्न सकिने अवस्था रहेको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडकखण्डमा त्रिशूली नदीले सडकमुनिबाट कटान गरेपछि २०८३ साल साउन ८ गते बिहान ८ बजेबाट सडक अवरुद्ध भएको थियो। त्यसपछि साउन १० गते आएको बाढीका कारण सडकको अधिकांश भाग नष्ट भएको प्रहरीले जनाएको छ।
यस्तै, त्रिशूली बजार, बेत्रावती बजार हुँदै रसुवागढी नाकासम्म जाने मुख्य पासाङ ल्हामु राजमार्गको त्रिशूली नदी किनारको अधिकांश भाग बाढीले कटान गरेपछि राजमार्ग पूर्ण रूपमा अवरुद्ध भएको छ। स्याफ्रुबेंसीसम्म जान काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेंसी पुग्ने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने प्रहरीले जनाएको छ।
मनाङमा रातिदेखि परेको अविरल वर्षाका कारण २०८३ साल असोज ९ गते बिहान ६ः३० बजे बाढी आएपछि बेँसीसहर हुँदै खाङसार जाने सडकखण्ड पूर्ण रूपमा अवरुद्ध भएको छ।
म्याग्दीको रघुगंगा गाउँपालिका–२ बैसरीमा २०८३ साल असोज १० गते बिहान ५ः५० बजे सडक माथिबाट लेदोमाटोसहितको पहिरो खसेपछि बेनी–जोमसोम सडकखण्ड पूर्ण रूपमा अवरुद्ध भएको प्रहरीले जनाएको छ।
हुम्लामा २०८३ साल असोज ९ देखि ११ गतेसम्म परेको अविरल वर्षाका कारण पहिरो खस्दा कर्णाली करिडोर र सिमकोट–हिल्सा सडकखण्डका विभिन्न स्थानमा आवागमन अवरुद्ध भएको छ। कर्णाली करिडोरअन्तर्गत खार्पुनाथ गाउँपालिका–१ मुसेडी, वडा नम्बर ५ बिसौनेडाँडा तथा श्यामने खोला र सर्केगार्ड गाउँपालिका–६ स्यालतडीमा असोज ११ गते बिहान ७ः४० बजे पहिरोका कारण सडक अवरुद्ध भएको प्रहरीले जनाएको छ।
त्यस्तै, सिमकोट–हिल्सा सडकखण्डअन्तर्गत नाम्खा गाउँपालिका–४ तथा सिमकोट गाउँपालिका–७ ठाडोढुंगा र यालबाङ क्षेत्रमा असोज १२ गते बिहान ९ बजे सडक अवरुद्ध भएको छ।
ललितपुरको बागमती गाउँपालिका–३ टाकुर्चेस्थित कान्तिलोकपथमा २०८३ साल असोज १५ गते दिउँसो ३ बजे पहिरो खसेपछि सडकखण्ड पूर्ण रूपमा अवरुद्ध भएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788940058.jpg)
-1786602170.png)
