काठमाडौं– परराष्ट्रमन्त्री शिशिर खनाल प्रि–कोप सम्मेलनमा सहभागी हुनका लागि फिजी जाने भएका छन्।
परराष्ट्र मन्त्रालय स्रोतका अनुसार उनी शनिबार फिजिका लागि प्रस्थान गर्नेछन् । मन्त्रालयले मन्त्रीको भ्रमणबारे आधिकारिक जानकारी भने गराएको छैन।
नोभेम्बर ९ देखि टर्कीमा हुने कोप–३१ को सम्मेलनअघि त्यसको तयारी बैठक फिजिमा बस्दैछ । सो बैठकमा सहभागी हुन उनी त्यहाँ जान लागेको स्रोतले बतायो।
जलवायु परिवर्तन सम्बन्धी संयुक्त राष्ट्रसङ्घीय खाका महासन्धीअन्तर्गत आयोजना हुने कोप सम्मेलन हुनुभन्दा एक महिनाअघि प्रि–कोप सम्मेलन हुँदै आएको छ।
कोप सम्मेलनमा छलफल हुने एजेन्डाहरू प्रि–कोपमा तय हुने गरेका छन्। जलवायु वित्त, हानि तथा क्षति, कार्बन उत्सर्जन कटौतीलगायतको विषयमा कोप सम्मेलनमा छलफल हुने गरेको छ । तर त्यसका जटिल विषयहरू प्रि–कोप सम्मेलनबाट टुंगाे लगाउने गरिएको छ ।
कोप सम्मेलनको क्रममा सबै कुरामा विस्तृत छलफल गर्न नभ्याइने भएकाले ती विषयहरूमा प्रि–कोप सम्मेलनमा नै छलफल गरेर टुंगाे लगाइने गरेको छ।
यो सम्मेलनका लागि नेपाल तयारीमा जुटेको छ । नोभेम्बर ९ देखि टर्कीमा सुरु हुने कोप–३१ मा नेपालबाट कसले नेतृत्व गरेर जाने अझै टुंगाे लागेको छैन। टर्कीबाट प्रधानमन्त्री वालेन्द्र(बालेन) शाहलाई निमन्त्रणा आएको छ । तर प्रधानमन्त्री जाने/नजाने टुंगाे लागेको छैन।
नेपालमा गत भदौ १० गते आएको बाढी कारण ठुलो क्षति भएको छ । त्यो बाढी जलवायु परिवर्तनका कारण भएकाले नेपालले क्षतिपूर्तिलगायत कार्बन उत्सर्जन, जलवायु वित्तको विषयमा कुरा राख्ने बताइएको छ ।
केही समयअघि सकिएको संयुक्त राष्ट्रसंघको ८१औँ महासभामा नेपालले जलवायु परिवर्तनको विषयलाई प्राथमिकतामा राखेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
