काठमाडौं– यस वर्षको बाढीपहिरोले नेपालको विद्युत् उत्पादनदेखि प्रसारण संरचनासम्म ठूलो क्षति पुर्याएको छ। ऊर्जा, जलस्रोत तथा सिँचाइमन्त्री विराजभक्त श्रेष्ठका अनुसार प्राकृतिक विपद्का कारण राष्ट्रिय विद्युत् प्रणालीमा करिब १ हजार मेगावाट उत्पादन अवरुद्ध भएको छ।
सोमबार सिंहदरबारमा सञ्चारकर्मीसँग कुरा गर्दै मन्त्री श्रेष्ठले बाढीपहिरोले जलविद्युत् आयोजनासँगै प्रसारण तथा वितरण संरचनामा समेत क्षति पुर्याउँदा विद्युत् उत्पादन र आपूर्तिको व्यवस्थापनमा चुनौती थपिएको बताए।
पछिल्लो वर्षाका कारण कालीगण्डकी करिडोर प्रसारणलाइन अवरुद्ध हुँदा मात्रै १३ वटा आयोजनाको करिब ३७० मेगावाट उत्पादन प्रभावित भएको उनले जानकारी दिए।
उत्पादन भए पनि प्रसारणमा समस्या
मन्त्री श्रेष्ठले पछिल्लो विपद्ले एउटा पुरानै समस्या पनि देखाएको बताए– उत्पादन क्षमता बढे पनि पर्याप्त प्रसारण पूर्वाधार नहुँदा उत्पादित विद्युत् एक ठाउँबाट अर्को ठाउँमा लैजान कठिन हुने गरेको छ।
उनका अनुसार विद्युत् उत्पादनसँगै प्रसारण संरचना विस्तारलाई पनि प्राथमिकतामा राख्नुपर्ने देखिएको छ। बाढीपहिरोका कारण प्रसारणलाइनमा क्षति पुगेपछि केही आयोजनाको उत्पादन प्रभावित भएको र विद्युत् प्रवाहमा समेत समस्या आएको उनको भनाइ छ।
पूर्व–पश्चिम विद्युत् प्रवाह सहज बनाउने तयारी
हेटौंडा–ढल्केवर प्रसारणलाइन चार्ज भएपछि देशको पूर्व र पश्चिमबीच विद्युत् आदानप्रदान थप सहज हुने मन्त्री श्रेष्ठले बताए।
उनका अनुसार उक्त प्रसारण संरचना सञ्चालनमा आएपछि पूर्वमा उत्पादित विद्युत् पश्चिमतर्फ र पश्चिममा उत्पादित विद्युत् पूर्वतर्फ पठाउन सहज हुनेछ। यसले क्षेत्रअनुसार देखिने विद्युत् व्यवस्थापनको समस्या कम गर्न सहयोग पुग्ने अपेक्षा गरिएको छ।
हाल विद्युत् प्रणाली व्यवस्थापनका लागि आन्तरिक उत्पादनलाई प्राथमिकता दिइएको र अपुग विद्युत् भारतबाट आयात गरेर आपूर्ति सन्तुलन मिलाइएको मन्त्री श्रेष्ठले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790596204.png)
-1786602170.png)
