काठमाडौं– भोलिदेखि काठमाडौंको भृकुटीमण्डपमा सुरु हुने ‘एचपी ल्युब्रिकेन्ट्स प्रिजेन्ट्स १८औँ नाडा अटो शो २०२६’ को सम्पूर्ण तयारी पूरा भएको छ। नेपाल अटोमोबाइल्स एसोसिएसन (नाडा)ले सोमबार पत्रकार सम्मेलन गरी प्रदर्शनीको तयारी पूरा भएको जानकारी दिएको हो।
नाडाका अध्यक्ष सुरेन्द्रकुमार उप्रेतीका अनुसार सोमबारसम्म २१५ भन्दा बढी स्टल तयार भइसकेका छन्। पत्रकारलाई प्रदर्शनीस्थलको अवलोकन गराउँदै अध्यक्ष उप्रेतीले विगतका वर्षको तुलनामा यसपटक स्टलहरू थप फराकिलो र व्यवस्थित बनाइएको दाबी गरे।
प्रदर्शनीस्थललाई ह्विलचेयरमैत्री बनाइएको छ भने पर्याप्त बत्ती, एसी तथा पंखाको व्यवस्था गरिएको नाडाले जनाएको छ।
प्रदर्शनीस्थललाई चारपाङ्ग्रे, दुईपाङ्ग्रे, वित्तीय संस्था, अटो पार्ट्स तथा ग्यारेज उपकरण, ‘मेड इन नेपाल/मेड फर नेपाल’ प्याभिलियन र इन्टरनेसनल बिजनेस प्याभिलियन गरी विभिन्न क्षेत्रमा विभाजन गरिएको छ।
अवलोकनकर्ताले पनि सवारीसाधन, वित्त, बीमा, सर्भिस तथा पार्ट्ससम्बन्धी जानकारी सहज रूपमा लिन सक्ने गरी प्रदर्शनीको व्यवस्थापन गरिएको नाडाले जनाएको छ। यसबाट सवारीसाधन खरिद गर्न चाहनेले मूल्य, सुविधा र वित्तीय व्यवस्थाबारे एकै स्थानबाट जानकारी लिन सक्नेछन्।
नाडाका अनुसार प्रदर्शनीमा ५३ वटा सवारी ब्रान्ड, ७० वटा पार्ट्स तथा सेवा कम्पनी र करिब ११ वटा बैंक तथा वित्तीय संस्था सहभागी भएका छन्।
अवलोकनकर्ताको सुविधालाई ध्यानमा राख्दै नाडाले अग्रिम टिकट बुकिङको व्यवस्था गरेको छ। खल्ती एप वा आधिकारिक क्यूआर कोडमार्फत टिकट खरिद गर्न सकिनेछ। सर्वसाधारणका लागि प्रवेश शुल्क २०० रुपैयाँ र विद्यार्थीका लागि १५० रुपैयाँ तोकिएको नाडाले जनाएको छ।
भोलि बिहान १०:३० बजेदेखि सुरु हुने अटो शोको उद्घाटन उपराष्ट्रपति रामसहायप्रसाद यादवले गर्ने कार्यक्रम छ।
अध्यक्ष उप्रेतीका अनुसार अटो शोमा आउने अवलोकनकर्ताका लागि नेपाल प्रहरी क्लबको ब्लु प्याभिलियनको भूमिगत पार्किङ र सिंहदरबारस्थित नेसनल ट्रेडिङ परिसरमा सवारी पार्किङको व्यवस्था गरिएको छ।
त्यस्तै, प्रदर्शनीस्थलमा ट्राफिक व्यवस्थापन सूचना डेस्क, मिडिया डेस्क, क्याफेटेरिया तथा आकस्मिक स्वास्थ्य सेवा उपलब्ध हुनेछ। नाडाले प्रदर्शनीस्थलमा सीसीटीभी निगरानी र अग्नि नियन्त्रण प्रणालीसमेत जडान गरिएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
