काठमाडौं– शोरिफुल इस्लामले करिअरकै उत्कृष्ट बलिङ गर्दै ७ विकेट लिएपछि बंगलादेशले दोस्रो टेस्टको दोस्रो दिन अस्ट्रेलियालाई पहिलो इनिङ्समा २१० रनमा अलआउट गरेको छ। यससँगै अस्ट्रेलियाले पहिलो इनिङ्समा १४६ रनको महत्त्वपूर्ण अग्रता बनाएको छ।
म्याकायमा भएको खेलको पहिलो दिन १८ विकेट झरेपछि बंगलादेशले आइतबार १६५–८ को अवस्थाबाट खेल सुरु गरेको थियो। बंगलादेश पहिलो इनिङ्समा ६४ रनमा समेटिएको थियो।
अस्ट्रेलियाका क्यामरन ग्रिनले महत्त्वपूर्ण ६७ रन बनाए। उनले आफ्नो आठौं टेस्ट अर्धशतक पूरा गर्दै टोलीको इनिङ्स सम्हाल्ने प्रयास गरेका थिए। ग्रिनले यसअघि डार्विनमा भएको पहिलो टेस्टमा शतक बनाएका थिए, जुन खेल बंगलादेशले ९ विकेटले जितेको थियो।
नथान लायनले पनि ३२ रनको योगदान दिए। उनले टास्किन अहमदको बलमा लामो छक्का प्रहार गर्दै अस्ट्रेलियाको स्कोर २०० रन पुर्याएका थिए। अन्तिम विकेटका लागि जोस हेजलउडले २४ महत्त्वपूर्ण रन थपे।
तर‚ शोरिफुल इस्लामको उत्कृष्ट बलिङका कारण अस्ट्रेलियाको इनिङ्स धेरै अघि बढ्न सकेन। उनले इन्स्विङ योर्करमार्फत ग्रिनलाई एलबीडब्ल्यू आउट गरे। शोरिफुलले ४८ रन खर्चेर ७ विकेट लिए। यो विदेशी भूमिमा टेस्ट खेल्दा कुनै पनि बंगलादेशी बलरको उत्कृष्ट बलिङ प्रदर्शन बनेको छ।
हेजलउड ६ रनमा तैजुल इस्लामको बलमा शादमान इस्लामबाट क्याच आउट भएपछि अस्ट्रेलियाको इनिङ्स २१० रनमा समाप्त भयो। लायन भने ३२ रनमा नटआउट रहे।
यसअघि बंगलादेश आफ्नो पहिलो इनिङ्समा केवल ६४ रनमा अलआउट भएको थियो। बंगलादेशका लागि सर्वाधिक रन बनाउने शोरिफुलले समेत १४ रन मात्र बनाउन सकेका थिए।
अस्ट्रेलियाका बायाँहाते तीव्र गतिका बलर मिचेल स्टार्कले पहिलो इनिङ्समा सनसनीपूर्ण प्रदर्शन गर्दै २२ बलमा पाँच विकेट लिएका थिए। उनले १० ओभरमा १२ रन खर्चेर ६ विकेट लिएपछि बंगलादेशमाथि दबाब थपिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
