काठमाडौं– अस्ट्रेलियाविरुद्धको टेस्ट सिरिज सुरु हुनुअघि क्रिकेट अस्ट्रेलिया–११ विरुद्धको अभ्यास खेलमा ५४ रनमै अलआउट भएको बंगलादेशले डार्विनमा भने सानदार पुनरागमन गर्दै ९ विकेटको ऐतिहासिक जित निकालेको थियो।
त्यही आत्मविश्वासका साथ म्याकाय टेस्टमा उत्रिएको बंगलादेश भने पहिलो इनिङ्समै निराशाजनक प्रदर्शन गर्दै आफ्नो टेस्ट इतिहासकै चौथो न्यूनतम ६४ रनमा अलआउट भएको छ।
बंगलादेशलाई सस्तैमा समेट्न अस्ट्रेलियालाई ३४ ओभर लाग्यो। टस हारेर पहिले ब्याटिङ गरेको बंगलादेशको शीर्षक्रमलाई मिचेल स्टार्कले सुरुआतमै तहसनहस पारे। स्टार्कले २२ बलमै ५ विकेट लिँदै बंगलादेशलाई ६.४ ओभरमा १२ रनमै ५ विकेट गुमाउने अवस्थामा पुर्याए। उनले चार ओभरमध्ये तीन मेडन राख्दै चार रन खर्चेर फाइफर पूरा गरेका थिए।
स्टार्कले इनिङ्सको पहिलो बलमै सादमान इस्लामलाई क्यामरन ग्रीनको हातबाट क्याच गराउँदै पभेलियन फर्काए। त्यसपछि अर्को ओभरमा लगातार दुई बलमा तान्जिद हसन तमीम र कप्तान नजमुल हुसेन शान्तलाई आउट गरे। बंगलादेशका सुरुआती तीन ब्याटर नै खाता खोल्न नपाउँदै आउट भए।
त्यसपछि मुमिनुल हक ९ रनमा स्टार्ककै बलमा आउट भए भने लिटन दास पाँच बल सामना गर्दै शून्य रनमै पभेलियन फर्किए। एक समय बंगलादेशले १२ रनमै पाँच विकेट गुमाइसकेको थियो।
मुशफिकुर रहिमले केही समय इनिङ्स सम्हाल्ने प्रयास गरे। उनले ४२ बल सामना गरे पनि ५ रनभन्दा बढी बनाउन सकेनन्। उनी आउट हुँदा बंगलादेश २१ रनमा ६ विकेट गुमाएको अवस्थामा थियो।
त्यसपछि मेहदी हसन मिराज र हसन महमुदले १४ रनको अविजित साझेदारी गर्दै पहिलो सत्र पार गरे। लन्चसम्म मिराज ११ र हसन ८ रनमा अविजित थिए। यससँगै बंगलादेश आफ्नो टेस्ट इतिहासकै न्यूनतम २६ रनमा अलआउट हुने सम्भावनाबाट भने टाढिएको थियो। तर‚ ४३ रनको न्यूनतम स्कोरको रेकर्डबाट बच्न अझै संघर्ष गर्नुपर्ने अवस्था थियो।
दोस्रो सत्रको सुरुआतमै प्याट कमिन्सले मिराज र हसनको साझेदारी तोडे। मिराज ११ रनमा ब्यू वेबस्टरको हातबाट क्याच भए। त्यसपछि अर्को ओभरमा जोस हेजलवुडले हसन महमुदलाई १० रनमा नाथन लायनको हातबाट क्याच गराए।
कमिन्सले त्यसपछि तास्किन अहमदलाई १ रनमा आउट गरे। उनी म्याथ्यु रेनशको हातबाट क्याच भए। ३९ रनमा नवौं विकेट गुमाएपछि बंगलादेश आफ्नो टेस्ट इतिहासकै न्यूनतम ४३ रनमा समेटिने जोखिममा पुगेको थियो।
तर‚ ताइजुल इस्लाम र शरीफुल इस्लामले टोलीलाई त्यो लज्जास्पद कीर्तिमानबाट जोगाए। ताइजुलले ३०औं ओभरको अन्तिम बलमा हेजलवुडलाई चौका प्रहार गर्दै टोलीको स्कोर ४३ रनभन्दा माथि पुर्याए। त्यसपछि शरीफुलले १४ रन बनाएर बंगलादेशको पारीमा सर्वाधिक व्यक्तिगत योगदान दिए।
शरीफुल र ताइजुलले अन्तिम विकेटका लागि ३५ बलमा २५ रनको महत्त्वपूर्ण साझेदारी गरे। अन्ततः स्टार्कले शरीफुललाई आउट गर्दै बंगलादेशको पारी ६४ रनमा टुंग्याए। ताइजुल ११ रनमा अविजित रहे।
अस्ट्रेलियाका लागि स्टार्क सर्वाधिक सफल बलर रहे। उनले १० ओभरमा १२ रन खर्चेर ६ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
