वीरगञ्ज –उच्च अदालत जनकपुरको अस्थायी इजलास वीरगञ्जले त्रिभुवन राजमार्गअन्तर्गत गण्डकदेखि रक्सौलको मितेरी पुलसम्मको सडक सीमा खाली गराउने सरकारी प्रक्रियाविरुद्ध नेपाल टेलिकमले दायर गरेको रिटमा अन्तरिम आदेश जारी गर्न अस्वीकार गरेको छ।
अदालतको यो निर्णयसँगै यसअघि सडक विस्तारको काम रोक्न जारी गरिएको अल्पकालीन अन्तरिम आदेशसमेत निरन्तर नहुने भएको छ।
न्यायाधीशद्वय ममता खनाल र दुर्गाप्रसाद ढुङ्गेलको संयुक्त इजलासले साउन २९ गते जारी भएको अल्पकालीन अन्तरिम आदेशलाई निरन्तरता नदिने निर्णय गरेको हो।
नेपाल दूरसञ्चार कम्पनी लिमिटेड (नेपाल टेलिकम)का तर्फबाट सङ्गीता अर्याल पहाडीले जिल्ला प्रशासन कार्यालय पर्सालगायतलाई विपक्षी बनाएर प्रतिषेध, उत्प्रेषण तथा परमादेश माग गर्दै रिट दायर गरेकी थिइन्।
रिटमा त्रिभुवन राजमार्गको केन्द्र रेखाबाट दायाँ र बायाँ २५/२५ मिटरभित्र रहेका संरचना हटाउने क्रममा नेपाल टेलिकमका पूर्वाधारसमेत प्रभावित हुने भएकाले सडक विस्तारसम्बन्धी प्रक्रिया रोक्न माग गरिएको थियो।
रिटमाथि प्रारम्भिक सुनुवाइका क्रममा अदालतले दुवै पक्षलाई छलफलका लागि बोलाउँदै त्यस अवधिसम्म सडक विस्तारको काम नगर्न–नगराउन अल्पकालीन अन्तरिम आदेश दिएको थियो। तर पछिल्लो सुनुवाइपछि अदालतले उक्त आदेशलाई निरन्तरता दिन आवश्यक नरहेको निष्कर्ष निकालेको हो।
अदालतले आफ्नो आदेशमा सार्वजनिक सडक ऐन, २०३१ को दफा ३ अनुसार तत्कालीन सरकारले २०३४ असार २० गते नेपाल राजपत्रमा सूचना प्रकाशित गरी राजमार्गको केन्द्र रेखाबाट दुवैतर्फ २५/२५ मिटर सडक सीमा निर्धारण गरिसकेको तथ्यलाई आधार बनाएको छ।
साथै, सोही सडक सीमाभित्र निर्माण भएका संरचना हटाउने विषयमा सर्वोच्च अदालतबाट यसअघि भएको निर्णयलाई समेत उच्च अदालतले आधार मानेको छ। सर्वोच्च अदालतले २०८१ फागुन २८ गते सम्बन्धित रिट खारेज गर्दै सडक सीमाभित्रका संरचना हटाउने सम्बन्धमा जारी सूचना तथा त्यसअनुसारको कारबाही कानूनविपरीत नदेखिएको ठहर गरेको थियो।
उच्च अदालतले त्रिभुवन राजमार्गको २५/२५ मिटरको सीमा हालसम्म परिवर्तन नभएको उल्लेख गर्दै उक्त क्षेत्र खाली गराउने सरकारी प्रक्रियाविरुद्ध तत्काल अन्तरिम आदेश दिनुपर्ने अवस्था नरहेको स्पष्ट पारेको छ।
यद्यपि, नेपाल टेलिकमले रिटमा उठाएका अन्य कानुनी तथा विषयगत प्रश्नको अन्तिम निर्णय भने मुद्दाको अन्तिम फैसला हुँदा मात्र हुने अदालतले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
