काठमाडौं– हिमालयन अर्गनाइजेशनअन्तर्गतको आयाम इन्टरकन्टिनेन्टल ले चीनको प्रतिष्ठित अटोमोबाइल कम्पनी डोङफेङका विद्युतीय बस नेपालमा सार्वजनिक गर्ने भएको छ।
कम्पनीका अनुसार आगामी भदौ २६ गतेदेखि काठमाडौंको भृकुटीमण्डपमा आयोजना हुने नाईमा अटो एक्स्पो मा डोङफेङका दुई मोडलका बस सार्वजनिक गरिनेछन्।
हाल ७.२ मिटर लम्बाइका २६ देखि ३० सिट क्षमताका बस प्रदर्शन गरिने कम्पनीले जनाएको छ। साथै निकट भविष्यमा ३८ र ५२ सिट क्षमताका ९ तथा १२ मिटर लम्बाइका बस पनि नेपाली बजारमा ल्याइने तयारी रहेको जानकारी दिएको छ।
सन् १९६९ मा स्थापना भएको डोङफेङ चीन सरकारको स्वामित्वमा रहेको प्रमुख अटोमोबाइल उत्पादक कम्पनी हो। कम्पनीले यात्रुवाहक तथा व्यावसायिक सवारी, बस, ट्रक, विद्युतीय सवारी (ईभी) र विशेष प्रयोजनका सवारीसाधन उत्पादन गर्दै आएको छ। डोङफेङका उत्पादन हाल विश्वका १०० भन्दा बढी देशमा निर्यात हुँदै आएका छन्।
आयाम इन्टरकन्टिनेन्टलले नेपाल सरकारले ठूला विद्युतीय बसलाई प्राथमिकता दिने नीति अघि बढाइरहेको र बजारमा यस्ता बसको माग बढिरहेको अवस्थालाई ध्यानमा राख्दै डोङफेङका बस भित्र्याइएको जनाएको छ।
कम्पनीका अनुसार बसको मूल्य तथा प्राविधिक विवरण अटो एक्स्पोमै सार्वजनिक गरिनेछ। साथै हाल नेपाली बजारमा उपलब्ध समान श्रेणीका बसभन्दा प्रतिस्पर्धी तथा कम मूल्यमा उपलब्ध गराइने दाबी गरिएको छ। एक्स्पो अवधिमा बुकिङ गर्ने ग्राहकका लागि विशेष छुटको व्यवस्था पनि गरिने कम्पनीले जनाएको छ।
बिक्रीपछिको सेवा र स्पेयर पार्ट्सको सुविधा भने हिमालयन अर्गनाइजेशनअन्तर्गतका शाखा तथा डिलरमार्फत देशका विभिन्न सहरमा उपलब्ध गराइने कम्पनीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
