काठमाडौं– आईसीसी विश्वकप लिग २ अन्तर्गत नेपालले स्कटल्याण्डलाई पराजित गरेको छ। नेपालले स्कटल्याण्डमाथि ६ विकेटको जित हात पारेको हो।
१९५ रनको लक्ष्य नेपालले ३८.१ ओभरमा ४ विकेट गुमाएर भेट्टायो। कप्तान रोहित पौडेल र डा. ईशान पाण्डेको उत्कृष्ट १०४ रनको शतकीय साझेदारीमा नेपालले सहजै खेल आफ्नो पोल्टामा पार्यो। उनीहरुबीच यो शतकीय साझेदारी तेस्रो विकेटका लागि १०४ रनको साझेदारी भयो।
दुवैले अर्धशतकीय पारी खेले। रोहित ७४ रनमा अविजित रहे भने ईशानले ५५ रनको योगदान दिए। एक दिवसीयमा भर्खरै डेब्यू पाएका इशानले पहिलो खेल अमेरिकाविरुद्ध अविजित २० रन बनाएका थिए । आफ्नो दोस्रो खेलमै उनले स्कटल्यान्डविरुद्ध र आफ्नो एक दिवसीय करिअरमा पहिलो अर्धशतक दर्ता गराएका हुन् ।
यस्तै, आसिफ शेखले २९ तथा कुशल भुर्तेलले २८ रन जोडे। बलिङतर्फ स्कटल्याण्डका मार्क वाटले दुई तथा ब्रेन्डन म्याकमुलेनले एक विकेट लिए।
त्यसअघि टस जितेर ब्याटिङ थालेको स्कटल्याण्ड ३९.१ ओभरमा १९४ रनमै अलआउट भयो।
ब्रेन्डन म्याकमुलेनले सर्वाधिक ७७ रन बनाउँदा माइकल इंग्लिसले पनि अर्धशतक बनाए। उनले ५१ रन जोडे। यस्तै, जर्ज मुन्सीले २१ तथा मार्क वाटले २० रन बनाउँदा अन्य ब्याट्सम्यानले दोहोरो अंकमा रन बनाउन सकेनन्।
बलिङतर्फ नेपालका ललित राजवंशीले चार तथा सन्दीप लामिछानेले तीन विकेट लिँदा नन्दन यादव, दीपेन्द्र सिंह ऐरी र सोमपाल कामीले एक–एक सफलता हात पारे। यस्तै लामिछानेले आजै विश्व रेकर्डसमेत कायम रहेका छन् । एकदिवसीयमा सबैभन्दा छिटो १५० विकेट लिने खेलाडीको सूचीमा उनी पहिलो भएका छन् ।
७७ खेलमा १५० विकेट लिएका अष्ट्रेलियाली बलर मिचेल स्टार्कको नाममा रहेको रेकर्ड लामिछानेले मात्र ७३ खेलमा १५० विकेट पूरा गरे । यति मात्र नभइ आज लिएको तीन विकेट सहित ७३ खेलमा लामिछानेको १५१ विकेट रहेको छ ।
यस जितसँगै नेपाल विश्वकप लिग २ को अंकतालिकामा पाँचौं स्थानमा उक्लिएको छ । विगत करिब डेढ वर्षदेखि सातौंस्थानमा रहेको नेपाल आजको जितसँगै नामिबियालाई पछि पार्दै पाँचौं स्थानमा उक्लिएको हो । नामिबिया र नेपालको समान २२ अंक रहेको छ । नेपालले नेटरनरेटका आधारमा नामिबियालाई उछिनेको हो ।
नेपालले बाँकी रहेका खेलहरुमा उत्कृष्ट प्रदर्शन गर्न सके शीर्ष चारमा रहेर सिधा ग्लोबल क्वालिफायरमा जानसक्ने सम्भावना पनि कायमै राखेको छ । अब नेपालले बाँकी ९ खेल खेल्नुपर्नेछ । यस श्रृंखला अन्तर्गतको अन्तिम खेल नेपालले अमेरिकासँग खेल्नेछ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
