काठमाडौं–ओपनर कुशल भुर्तेलको अविजित शतकीय पारीमा आईसीसी एक दिवसीय विश्वकप लिग २ मा नेपालले अमेरिकालाई ९ विकेटको फराकिलो जित निकालेको छ ।
टस जितेर पहिला ब्याटिङ गर्दै अमेरिकाले दिएको १९६ रुनको सजिलो लक्ष्य नेपालले ३६ दशमलव ४ ओभरमा मात्र १ विकेटको क्षतिमा १९९ रन बनाएर सहजै लक्ष्य पूरा गर्यो ।
नेपालका लागि ओपनर कुशल भुर्तेलले उत्कृष्ट शतकीय पारी खेले । १०४ बलमा शतक पूरा गरेका भुर्तेलले ११८ बलमा अविजित १२० रनको शानदार पारी खेले । उनले १३ चौका र ४ छक्का प्रहार गरे । एक दिवसीयमा भुर्तेलको यो दोस्रो अर्धशतक हो । र उनको उच्च स्कोर पनि आजकै खेल हो । उनले ओडीआईमा आजको सहित १०औं अर्धशतक पनि प्रहार गरेका छन् ।
यस्तै डा.इशान पाण्डे पनि एक चौकासहित २० रनमा अविजित रहे । अर्का ओपनर आशिफ शेखले अर्धशतक प्रहार गरे । उनले ७२ बल खेल्दै ८ चौकाको सहयोगमा ५६ रनको योगदान दिए ।
ओपनर भुर्तेल र आशिफबीच १४५ रनको ओपनिङ साझेदारी भएको थियो । बलिङमा अमेरिकाका मोहम्मद मोहसिनले १ विकेट लिनुबाहेक अन्य बलरले कसिलो बलिङ नै गर्न सकेनन् ।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको अमेरिकाले ४३.३ ओभरमा सबै विकेट गुमाउँदै १९५ रन बनाएको थियो।
अमेरिकाका लागि ओपनर स्मित पटेल र शेहान जयसूर्याले अर्धशतकीय पारी खेले । अमेरिकालाई राम्रो सुरुआत दिलाउने क्रममा पटेलले ८९ बलमा तीन छक्का र आठ चौकाको सहयोगमा ८३ रन बनाए भने जयसूर्याले ५२ बल खेल्दै एक छक्का र पाँच चौकाको सहयोगमा ५० रन बनाए । साथै मिलिन्द कुमारले २८ र हर्मित सिंहले १४ रन बनाए भने अन्य कुनै ब्याटरले दोहोरो अंकमा रन बनाउन सकेनन् ।
नेपालका लागि दीपेन्द्र सिंह ऐरीले चार र सोमपाल कामीले दुई विकेट लिए । साथै सन्दीप लामिछाने र गुलशन झाले एक/एक विकेट लिए ।
नेपाल, अमेरिका र स्कटल्याण्डबीचको जारी शृङ्खलामा हालसम्म दुई खेल सकिएका छन् । दुवै खेलमा स्कटल्याण्ड विजयी भएको छ । पहिलो खेलमा स्कटल्याण्डले नेपाललाई डकवर्थ लिइस नियमका आधारमा दुई रनले पराजित गरेको थियो भने अर्को खेलमा पनि स्कटल्याण्डले अमेरिकालाई सोही नियमका आधारमा दुई रनले नै पराजित गरेको थियो ।
आजको खेलसँगै सातौं स्थानमै यथावत रहेको नेपालको २० अंक रहेको छ । नेपालले अब बाँकी रहेका १० वटै खेलमा अधिकांशमा जित हासिल गर्नसके शीर्ष चारमा रहँदै ग्लोबल क्वालिफायरमा पुग्न सक्नेछ । अंक तालिमा स्कटल्यान्ड शीर्ष स्थानमा रहेको छ भने अमेरिका ३६ अंकसहित दोस्रो स्थानमा छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
