काठमाडौं– आईसीसी विश्वकप लिग–२ को त्रिकोणात्मक सिरिजअघि खेलिएका अभ्यास खेलमा स्कटल्यान्ड नेपाल ‘ए’ सँग लगातार दोस्रो खेलमा पनि पराजित भएको छ ।
अमेरिका, स्कटल्यान्ड र नेपाली टिम ‘ए’बीच चार खेलको शृंखला अन्तर्गत स्कटल्यान्ड दोस्रो खेलमा नेपाल ‘ए’सँग ९ रनले पराजित भएको हो । नेपालको भने तीन अभ्यास खेलमध्ये तीनैमा लगातार जित रहेको छ ।
आजको खेलमा टस जितेर पहिले ब्याटिङ गर्दै स्कटल्यान्डले निर्धारित ५० ओभरमा ७ विकेट गुमाउँदै ३०२ रनको विशाल स्कोर खडा गरेको थियो ।
यता ३०३ रनको लक्ष्य पछ्याउने क्रममा नेपालले ३४ दशमलव ५ ओभरमा ४ विकेट गुमाउँदै २०४ रन बनायो । त्यसपछि हावाहुरीसहित पानी पर्न थालेपछि खेल रोकिएको थियो । पानी नरोकिएपछि खेल डीएलएस पद्धतिमा गयो र नेपाल ‘ए’ले ९ रनको जित निकाल्यो । पहिलो खेलमा स्कटल्यान्ड नेपाल ‘ए’सँग ४५ रनले पराजित भएको थियो ।
आजको खेलमा नेपालका लागि सन्दीप जोरा र डा इशान पाण्डेले शतकीय साझेदारी गरेका थिए । इशानले ५० रनको अर्धशतकीय पारी खेल्दा सन्दीप ८३ रनमा अविजित रहे ।
यस्तै दोस्रो अभ्यास खेलमा पनि नेपाल ‘ए’ले निर्धारित ५० ओभरमा ५ बल बाँकी छँदै अमेरिकाविरुद्ध ३ विकेटको जित निकालेको थियो । अभ्यास खेलको सिरिज अन्तर्गत नेपाल ‘ए’ले अन्तिम खेल अमेरिकासँग सोमबार अमेरिकासँग खेल्नेछ ।
लिग २ को खेल भने मंगलबारदेखि त्रिवि अन्तर्राष्ट्रिय क्रिकेट मैदानमा हुनेछ । पहिलो खेल नेपाली राष्ट्रिय टोली र स्कटल्यान्डबीच नै हुनेछ । स्कटल्यान्ड र अमेरिकाले आफ्नो १५ टोलीको स्क्वाड घोषणा गरिसक्दा नेपालले भने गरेको छैन । नेपाल ‘ए’टीममा भएका केही खेलाडीहरुको प्रदर्शन उच्च रहेकाले त्यसबाट केही खेलाडी सहभागी गराएर नेपाली टोली घोषणा गर्ने क्यानको तयारी रहेको बताइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
