काठमाडौं– आईसीसी विश्वकप लिग २ अन्तर्गत नेपाल, ओमान र यूएई सम्मिलित सिरिज अन्तर्गत अन्तिम खेलमा नेपालले ओमानमाथि ८१ रनको फराकिलो जित निकालेको छ ।
गुलशन झाले पाँच विकेट लिएपछि नेपालले भारी अन्तरको जित निकालेको हो । नेपालले दिएको २५७ रनको लक्ष्य पछ्याउने क्रममा ओमान ३९ दशमलव ५ ओभरमा अलआउट हुँदै १७५ रनमा समेटियो ।
ओमानका लागि विनायक शुक्लाले सर्वाधिक ३६ रन बनाए । यस्तै हम्मद मिर्जाले ३४, हसनैन युई वाहबले २९, हसनैन शाहले १४, जतिन्दर सिंह र नदीम खानले १२/१२ रन बनाए ।
नेपालको जितमा बलिङमा गुलशन झाले ५ विकेट लिए । ९ ओभर बलिङ गरेका उनले ३८ रन खर्चिँदै ५ विकेट लिएका हुन् । यस्तै करण केसी, नन्दन यादव, दीपेन्द्र सिंह ऐरी र सन्दीप लामिछानेले १/१ विकेट लिए ।
त्यसअघि पहिले ब्याटिङ गरेको नेपालले ४९ दशमलव ५ ओभरमा अलआउट हुँदै २५६ रन बनाएको थियो । नेपालका लागि ओपनर आशिफ शेखले सर्वाधिक ९४ रनको पारी खेले । उनले ७ चौका र ५ छक्का हिर्काए ।
यस्तै अर्का ओपनर अर्जुन कुमालले ४८ रन बनाउँदा आरिफ शेखले ४३ रन जोडे । दीपेन्द्र सिंह ऐरीले ३३, गुलशन झाले १७ रनको योगदान दिए ।
ओमानका लागि बलिङमा नदीम खानले ३, सकील अहमद र हसनैन शाहले २/२ विकेट लिँदा जतीन रमानन्दी र आर्यन बिसथले १/१ विकेट लिए ।
तीन देश सम्मिलित सिरिजमा नेपालले चारमध्ये तीन खेलमा जित निकाल्दै ६ अंक बटुलेको छ । पहिलो खेल ओमानसँगै १०२ रनले पराजित भएको थियो । त्यसपछि यूएईसँगका दुई खेल र अन्तिम खेल ओमानसँग जित निकाल्दै चारमध्ये नेपालले तीनमा जित निकालेको हो । यूएईले दुईमा जित निकाल्दा ओमान एक जितमै सिमित भयो ।
यो सिरिजमा तीन जितसँगै नेपालको १८ अंक भएको छ । २४ खेलमा ८ मा जित र दुई खेलमा अंक बाँड्दा नेपाल १८ अंक बटुल्दै सातौं स्थानमा छ । नेपालभन्दा माथि रहेको क्यानडाको २४ खेलमा ९ जित र तीन खेलमा अंक बाँड्दै २१ अंक रहेको छ । मात्र सात खेल जितेको यूएई भने १४ अंकसहित आठौं स्थानमै रहेको छ ।
यता अंकतालिकामा ३६ अंकसहित अमेरिका पहिलो स्थानमा रहँदा स्कटल्यान्ड ३४ अंकसहित दोस्रो र ३१ अंक रहेको ओमान तेस्रो नम्बरमा छ । नेदरल्यान्ड २८ अंकसहित चौथोमा रहँदा नामिबिया २२ अंकसहित पाँचौं स्थानमा छ ।
लिग २ का ३६ खेलमध्ये अब नेपालले १२ खेल मात्र खेल्न बाँकी छ । शीर्ष चारमा रहनका लागि बाँकीका खेलमध्ये अधिकांशमा जित निकाल्नुपर्ने बाध्यता नेपाललाई छ । शीर्ष चारमा रहने टोली आगामी एक दिवसीय विश्वकपमा सोझै छनोट हुनेछन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
