काठमाडौं–ओपनर कुशल भुर्तेलको ८४ रनको अविजित पारीमा नेपालले दुई खेलको टी–२० आई सिरिज अन्तर्गत दोस्रो खेलमा यूएईलाई ८ विकेटले पराजित गरेको छ ।
त्रिवि अन्तर्राष्ट्रिय क्रिकेट मैदानमा यूएईले दिएको १२९ रनको लक्ष्य नेपालले १५ दशमलव ५ ओभरमा मात्र २ विकेट गुमाउँदै पूरा गर्यो । त्रिवि क्रिकेट मैदानमा फ्लड लाइटमा अन्तर्राष्ट्रिय क्रिकेट प्रतियोगितामा नेपालको यो पहिलो जित हो ।
नेपालको जितमा ओपनर भुर्तेलले ५७ बल खेल्दै १२ चौका र दुई छक्कासहित अविजित ८४ रनको पारी खेले । कप्तान दीपेन्द्र सिंह ऐरी पनि २३ रनमा अविजित रहे । यस्तै अर्का ओपनर कुशल मल्लले १७ बलमा १९ रन बनाउँदा अन्तर्राष्ट्रिय खेलमा राष्ट्रिय टोलीबाट डेब्यू गरेका सन्तोष यादव १ रनमै रनआउट भएका थिए ।
बलिङमा यूएईका लागि निलनास केसवानी र मुहम्मद अर्फानले एक/एक विकेट लिए ।
त्यसअघि पहिले ब्याटिङ गरेको यूएईले निर्धारित २० ओभरमा ८ विकेट गुमाउँदै १२८ रन बनाएको थियो । उसका लागि अक्षदीप नाथले अविजित ५३ रनको अर्धशतकीय पारी खेलेका थिए । अदीश उस्मानीले ३० र मुहम्मद अर्फानले ३२ रन बनाए ।
बलिङमा नेपालका लागि आज पनि सन्दीप लामिछानेले ३ विकेट लिए । उनले ४ ओभर बलिङ गर्दै एक मेडनसहित मात्र ६ रन खर्चिएका थिए । यस्तै हेमन्त धामीले २, नन्दन यादव र शाहब आलमले १/१ विकेट लिए । पहिलो खेलमा नेपाल यूएईसँग ६ विकेटले पराजित भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
