काठमाडौँ– सन् २०२६ को मार्च महिनामा नेपालमा १ लाख २० हजार ५ सय १६ विदेशी पर्यटक भित्रिएका छन् । नेपाल पर्यटन बोर्डका अनुसार विशेषगरी दक्षिण एसिया र अन्य एसियाली मुलुकबाट आउने पर्यटकको संख्या उल्लेखनीय रूपमा बढेको देखिएको छ ।
मार्च महिनामा मात्रै सार्क राष्ट्रहरूबाट ४२ हजार ६६८ पर्यटक नेपाल आएका छन्, जुन कुल आगमनको करिब ३५ प्रतिशत हो । यसमध्ये भारतबाट सबैभन्दा धेरै २५ हजार ७२८ पर्यटक आएका छन् भने श्रीलंकाबाट १० हजार ७५९ र बंगलादेशबाट ४ हजार ६७६ जना नेपाल भ्रमणमा आएका छन् ।
त्यसैगरी अन्य एसियाली मुलुकबाट पनि उत्साहजनक आगमन भएको छ । चीनबाट ११ हजार २२०, म्यानमारबाट ६ हजार २० र थाइल्यान्डबाट ३ हजार ८९७ पर्यटक नेपाल आएका छन् । जापान, मलेसिया र दक्षिण कोरियाबाट पनि राम्रो संख्यामा पर्यटक भित्रिएका छन् । समग्रमा अन्य एसियाली क्षेत्रबाट ३३ हजार ४३६ पर्यटक आएका छन्, जुन कुल आगमनको करिब २८ प्रतिशत हो ।
युरोप र अमेरिकाबाट आउने पर्यटकको संख्या भने स्थिर रहेको छ । पश्चिम एसियामा जारी द्वन्द्वका कारण अन्तर्राष्ट्रिय उडान र यात्रा योजना प्रभावित हुँदा ती क्षेत्रबाट आगमनमा अपेक्षित वृद्धि हुन सकेको छैन । यद्यपि यी क्षेत्रका पर्यटक उच्च खर्च गर्ने भएकाले उनीहरूको योगदान महत्त्वपूर्ण मानिन्छ ।
तथ्यांकअनुसार, सन् २०२५ को मार्चमा १ लाख २१ हजार ६८७ पर्यटक नेपाल आएका थिए भने कोभिड–१९ अघिको सोही अवधिमा १ लाख २७ हजार ३५१ आगमन भएको थियो । यसैगरी २०२६ को फेब्रुअरीमा १ लाख ५ हजार ४४१ पर्यटक भित्रिएका थिए ।
मार्च र अप्रिललाई पर्यटनको मुख्य सिजनका रूपमा लिइन्छ, विशेषगरी ट्रेकिङ, हिमाल आरोहण र सांस्कृतिक भ्रमणका लागि । तर यस वर्ष पश्चिम एसियामा बढ्दो तनाव र ‘ट्राभल एड्भाइजरी’ का कारण अपेक्षित वृद्धि हुन नसकेको देखिन्छ ।
नेपाल पर्यटन बोर्डका प्रमुख कार्यकारी अधिकृत दीपकराज जोशीका अनुसार विश्वव्यापी चुनौतीका बाबजुद पनि आगमन दर निराशाजनक छैन । उनले छिमेकी मुलुकहरूबाट बढ्दो पर्यटक आगमनलाई सकारात्मक संकेत मान्दै ती बजारलाई लक्षित प्रवर्द्धनलाई प्राथमिकता दिइएको बताए । साथै युरोप र अमेरिकाजस्ता उच्च खर्च गर्ने बजारमा पनि अन्तर्राष्ट्रिय स्तरमा उपस्थिति बलियो बनाइँदै लगिएको जानकारी दिए ।
जोशीले हालको अवस्थाले चिन्तित हुनुपर्ने अवस्था नरहे पनि पूर्ण रूपमा ढुक्क हुने समय नभएको उल्लेख गरे । उनले पश्चिम एसियाको अनिश्चित परिस्थितिले भविष्यमा विश्व पर्यटन बजारमा असर पार्न सक्ने भन्दै नेपालले वैकल्पिक बजार विस्तार र दिगो रणनीतिमा ध्यान दिइरहेको बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
