काठमाडौं– नेपाल पुलिस क्लबले जय ट्रफी मेन्स इलिट कप क्रिकेटको उपाधि लगातार दोस्रोपटक जितेको छ । रशिद खान र कुशल भुर्तेलले ९४ रनको साझेदारी गरेपछि पुलिसले उपाधि आफ्नो हात पारेको हो । पुलिसले बिहीबार मूलपानीको माथिल्लो क्रिकेट मैदानमा भएको फाइनल खेलमा त्रिभुवन आर्मी क्लबलाई ४ विकेटले पराजित गरेको हो ।
पुलिसले २ सय २७ रनको लक्ष्य तेस्रो तथा अन्तिम दिनको खेलको चिया सत्रपछि पूरा गर्यो । पुलिसले सो क्रममा ५७ ओभरभित्र २ सय ३० रन बनाउँदै पुरा गर्यो । गत वर्ष वीरगञ्जमा पनि पुलिसले आर्मीलाई नै पराजित गर्दै उपाधि जितेको थियो । दिलशाद अली ५७ बल खेलि ४ चौका र १ छक्का प्रहार गरी ३१ र शंकर राना ८ बल खेली २ चौका प्रहार गरि १३ रनमा अविजित रहे ।
अमित श्रेष्ठ शून्य र दिनेश खरेल २५ रनमा आउट भएपछि रशिद र कुशलले तेस्रो विकेटमा ठोस साझेदारी गरे । कुशलले ५१ र रशिदले ८१ रन बनाए । कुशलले ६४ बल खेली ५ चौका र रशिदले १ सय २८ बल खेली ८ चौका र ३ छक्का प्रहार गरे ।
कप्तान आरिफ शेख २१ बल खेली समान १ चौका र छक्का प्रहार गर्दै १४ र गुलशन झा १ रनमा आउट भए । आर्मीका पवन कार्कीले २ र शाहब आलमले १ विकेट लिए ।
यसअघि १७८–९ बाट तेस्रो दिनको खेलको सुरुआत गरेको पुलिसले थप ४८ रन जोडेको थियो । आकाश चन्द र घाइते अवस्थामा ब्याटिङ गरेका सोमपाल कामीले दशौं विकेटमा कुल ४९ रन जोडे । सागर ढकालले आकाशलाई आउट गरि यो साझेदारी तोडेका थिए ।
आकाशले १ सय २ बल खेलि ५ चौकासहित ३७ रन बनाए । देब्रेहातमा लागेको चोटका बावजुद खेलेका सोमपाल २३ रनमा अविजित रहे । उनले ७६ बल खेल्दै ३ चौका प्रहार गरे । सागरले १६.२ ओभरमा २ मेडन राख्दै ४३ रन खर्चेर ४ विकेट लिए । करण केसी र ललित राजवंशीले ३–३ विकेट लिए ।
पहिलो इनिङ्समा दुवै टोलीले समान २ सय २१ रन बनाएका थिए । इमरान शेखको ५०, भीम सार्कीको ३९ र कुशल मल्लको ३८ रनमा आर्मीले पहिलो इनिङ्समा २ सय २१ रन बनाएको थियो । करणले अविजित ७२ रन बनाएपछि पुलिसको पहिलो इनिङ्सको स्कोर पनि २ सय २१ रनमै रोकिएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
