काठमाडौं– भारतले आइतबार न्युजिल्यान्डलाई ९८ रनले पराजित गर्दै टी–२० विश्वकपको उपाधि जितेको छ । पहिले ब्याटिङ गर्दै भारतले दिएको २ सय ५६ रनको लक्ष्य पछ्याउने क्रममा न्युजिल्यान्ड १९ ओभरमा १ सय ५९ रनमा अलआउट भयो ।
एक लाख दर्शकको उपस्थिति रहेको अहमदाबाद स्थित नरेन्द्र मोदी रंगशालामा भारतको यो जितले उत्साह थपेको थियो । भारत यही मैदानमा २०२३ को एकदिवसीय विश्वकप फाइनलमा अस्ट्रेलियासँग पराजित भएको थियो । न्युजिल्यान्ड यस पटक पनि फाइनलमा चुक्न पुग्यो । न्युजिल्यान्डले अझै सेता बलमा विश्वकप जित्न सकेको छैन ।
न्युजिल्यान्डबाट ओपनर टिम सेइफर्टले २६ बल खेलि २ चौका र ५ छक्कासहित ५२ तथा कप्तान मिचेल सान्टनरले ३५ बल खेलि ३ चौका र २ छक्कासहित ४३ रन बनाए । भारतको जस्प्रित बुमराहले ४ ओभरमा १५ रनमात्र खर्चेर ४ र अक्षर पटेलले ३ ओभरमा २७ रनमात्र खर्चेर ३ विकेट लिए ।
उपाधि रक्षा गर्ने भारत पहिलो टोली भएको छ । दुई वर्ष अघि वेस्ट इन्डिजमा भएको फाइनलमा भारतले दक्षिण अफ्रिकालाई पराजित गरेको थियो । साथै भारत ट्वान्टी–२० विश्वकप ३ पटक जित्ने पहिलो राष्ट्र पनि भएको छ । ट्वान्टी–२० विश्वकपको १० संस्करणमा पहिलो पटक घरेलु टाली विजेता बनेको हो ।
यसअघि सञ्जु सामसनले ४६ बलमा ८९ रन बनाएपछि टस हारेर ब्याटिङमा आएको भारतले निर्धारित २० ओभरमा ५ विकेट गुमाई २ सय ५५ रन बनाएको थियो । पछिल्ला दुई इनिङ्समा क्रमशः अविजित ९७ र ८९ रन बनाएका सामसनले ५ चौका र ८ छक्का प्रहार गरेका थिए ।
भारतले ६ ओभरको पहिलो पावर प्लेमै विना क्षती ९२ रन जोडेर खेल आफ्नो पक्षमा ढल्काएको थियो । सामसन र अभिषेक शर्माले पहिलो विकेटमा ९८ रनको साझेदारी गरेपछि भारतले यस विश्वकपमा आफ्नो दोस्रो उच्च स्कोर बनाएको थियो । जिम्बावेविरुद्धको ‘सुपर एट’ को खेलमा पनि टोलीले २ सय ५८ रन बनाएको थियो ।
अभिषेकले २१ बलमा ५२ रन बनाए । देव्रेहाते स्पिनर रचिन रवीन्द्रको अफ स्टम्प बाहिर गएको बलमा आउट हुनुपूर्व उनले ६ चौका र ३ छक्का प्रहार गरे । प्रतियोगितामा यो उनको दोस्रो अर्धशतक हो । सामसन र इशान किसन मिलेर पुन न्युजिल्यान्डका बलरमाथि निर्मम प्रहार गरेका थिए । सामसनले रवीन्द्रलाई लगातार तेस्रो छक्का प्रहार गर्दै प्रतियोगितामा आफ्नो तेस्रो अर्धशतक पुरा गरेका थिए ।
किशनले ५४ रन बनाए । उनले २५ बल खेलि समान ४ चौका र छक्का प्रहार गरे । जिम्मी निसमले एकै ओभरमा ३ विकेट लिएका थिए । उनले सामसन, किशन र कप्तान सूर्यकुमार यादवलाई शुन्यमा आउट गरेका थिए । तर त्योभन्दा अघि नै भारतले २ सय रनको स्कोरलाई उछिनिसकेको थियो ।
शिवम दुबेले अन्तिम ओभरमा निसमलाई ३ चौका र २ छक्का प्रहार गरेपछि भारतले २ सय ५० रनलाई उछिनेको थियो । दुबे ८ बलमा २६ रन बनाई अविजित रहे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
