काठमाडौं– भारतको अहमदावादस्थित नरेन्द्र मोदी अन्तर्राष्ट्रिय क्रिकेट स्टेडियममा भइरहेको आईसीसी टी–२० विश्वकपको फाइनल खेलमा भारतले न्युजिल्यान्डविरुद्ध विश्वकप इतिहासमै फाइनल खेलमा उच्च स्कोरको कीर्तिमानी लक्ष्य दिएको छ ।
तीन जना ब्याटरको अर्धशतकीय पारीमा भारतले न्यूजिल्यान्डलाई २५६ रनको विशाल लक्ष्य प्रस्तुत गरेको हो । यो लक्ष्य टी–२० क्रिकेट इतिहासमै उपाधि भीडन्तमा अहिलेसम्मकै धेरै हो । टस हारेर पहिले ब्याटिङ गर्दै भारतले निर्धारित २० ओभरमा ५ विकेटको क्षतिमा २५५ रन बनाएको हो ।
भारतका लागि ओपनर अभिषेक शर्माले पहिलो पावर प्लेमै अर्धशतक प्रहार गरेका थिए । मात्र १९ बलमा अर्धशतक प्रहार गरेका उनले आउट हुनुअघि २१ बलमा ५२ रनको योगदान दिए । यस्तै अर्का ओपनर सन्जु सामसनले पनि आक्रामक पारी खेल्दै ४६ बलमा ८९ रन बनाए ।
तेस्रो चौथो नम्बरमा आएका ईशान किशनले पनि २५ बलमा ५४ रनको अर्धशतकीय पारी खेले । हार्दिक पाण्ड्याले १८ रन जोड्दा शिवम दुवेले अविजित २६ र तिलक वर्माले अविजित ८ रन जोडे । कप्तान सूंर्यकुमार यादव भने गोल्डेन डगआउट भएका थिए ।
यता न्यूजिल्यान्डका लागि जिम्मी निशमले सर्वाधिक ३ विकेट लिए । अन्तिम ओभरमा २४ रन खर्चिँदा उनले पनि ४ ओभरमा ४६ रन दिए । यस्तै एक विकेट लिएका म्याट हेनरीले पनि ४ ओभरमा ४९ रन खर्चिए । रचिन रविन्द्रले सुरुमै विकेट निकाले पनि उनले २ ओभरमा ३२ रन खर्चिए ।
कीर्तिमान
भारतले मात्र ७ दशमलव २ ओभरमा १०० रन पार गरेको थियो । यो स्कोर टी–२० विश्वकपको नकआउट प्रतिस्पर्धमा सबैभन्दा धेरै रन हो ।
भारतीय टिमले पहिलो पावर प्लेमै बिना विकेटको क्षतिमा ९२ रन बनायो । पछिल्लो रेकर्ड ९२/१ थियो । जो २०२४ मा बनेको थियो ।
सामसन टी–२० विश्वकप फाइनलमा सबैभन्दा धेरै रन बनाउने खेलाडी बनेका छन् । उनले वेस्ट इन्डिजमा मार्लोन श्यामुअलको ८५ रनको रेकर्ड तोडेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1783240079.png)
-1764146706.png)
