काठमाडौं– आईसीसी टी–२० विश्वकपको १०औं संस्करण आज (शनिबार)देखि शुरू हुँदैछ।
प्रतियोगिताको पहिलो दिन शनिबार तीन खेल हुने छन्। पहिलो खेलमा पाकिस्तानले नेदरल्यान्ड्सको सामना गर्नेछ। उक्त खेल श्रीलंकाको कोलम्बोमा बिहान ११:१५ बजे शुरू हुनेछ। पहिलो दिनको दोस्रो खेल वेस्ट इन्डिज र स्कटल्यान्डबीच खेलिने छ। उक्त खेल भारतको कोलकातामा दिउँसो ३ बजे शुरू हुनेछ।
यसैगरी, पहिलो दिनको तेस्रो खेल भारत र अमेरिकाबीच खेलिने छ। भारत र अमेरिकाबीचको खेल १९:१५ बजे मुम्बईको वानखेडे स्टेडियममा हुनेछ।
भारत र श्रीलंकाले संयुक्त रूपमा आयोजना गरेको विश्वकपका खेलहरू यी दुई राष्ट्रका विभिन्न शहरमा खेलाइने छन्। प्रतियोगिता मार्च ८ तारिखसम्म चल्नेछ।
सन् २००७ देखि शुरू भएको टी–२० विश्वकपको १०औं संस्करणमा २० टोलीले सहभागिता जनाउँदै छन्। प्रतियोगितामा सहभागी टोलीलाई चार समूहमा विभाजन गरिएको छ।
समूह ‘ए’ मा भारत, नामिबिया, नेदरल्यान्ड्स, पाकिस्तान र अमेरिका छन्। समूह ‘बी’ मा अस्ट्रेलिया, आयरल्यान्ड, ओमान, श्रीलंका र जिम्बाब्वे रहेका छन्।
यसैगरी, समूह ‘सी’ मा नेपाल, इङ्ल्यान्ड, इटाली, स्कटल्यान्ड र वेस्ट इन्डिज छन्। समूह ‘डी’ मा भने अफगानिस्तान, क्यानडा, न्युजिल्यान्ड, दक्षिण अफ्रिका र संयुक्त अरब इमिरेट्स (यूएई) रहेका छन्।
विश्वकपमा इङ्ल्यान्ड, भारत, वेस्ट इन्डिज, अस्ट्रेलिया, पाकिस्तान, श्रीलंका, न्युजिल्यान्ड र दक्षिण अफ्रिकाको यो १०औं सहभागिता हुनेछ। आयरल्यान्डले नवौं र अफगानिस्तानले आठौंपटक विश्वकप खेल्न लागेका हुन्। नेदरल्यान्ड्स, स्कटल्यान्ड र जिम्बाब्वेले भने सातौंपटक विश्वकपमा सहभागिता जनाउन लागेका हुन्।
टी–२० विश्वकपमा नामिबिया र ओमानको चौथो सहभागिता हुनेछ। नेपाल र यूएईले भने तेस्रोपटक विश्वकप खेल्न लागेका हुन्। यसैगरी, अमेरिका र क्यानडाको टी–२० विश्वकपमा यो दोस्रो सहभागिता हुनेछ। इटालीले भने पहिलोपटक विश्वकपमा सहभागिता जनाउन लागेको हो।
समूहगत चरणको खेलपछि अंक तालिकाको माथिल्लो स्थानमा रहने दुई–दुई टोली प्रतियोगिताको ‘सुपर–८’ चरणमा प्रवेश गर्नेछन्। समूहगत चरणको खेल फेब्रुअरी २० तारिखसम्म चल्नेछ।
‘सुपर–८’ चरणमा पुगेका टोलीलाई पनि दुई समूहमा विभाजन गरिने छ। त्यसपछि दुवै समूहबाट दुई–दुई टोली प्रतियोगिताको सेमिफाइनलमा प्रवेश गर्नेछन्। ‘सुपर–८’ चरण मार्च १ तारिखसम्म चल्नेछ।
पहिलो सेमिफाइनल खेल मार्च ४ र दोस्रो सेमिफाइनल खेल मार्च ५ मा हुनेछ। सेमिफाइनलमा विजयी दुई टोलीबीच मार्च ८ तारिखमा फाइनल खेल हुनेछ। यो विश्वकपमा कुल ५५ खेल हुने छन्।
टी–२० विश्वकप दुई राष्ट्रले आयोजना गर्न लागेको यो तेस्रोपटक हो।
यसअघि, सन् २०२१ को विश्वकप यूएई र ओमानमा संयुक्त रूपमा आयोजना भएको थियो। सन् २०२४ को टी–२० विश्वकप पनि वेस्ट इन्डिज र अमेरिकामा संयुक्त रूपमा आयोजना भएको थियो। हालसम्म ६ वटा राष्ट्रले मात्र टी–२० विश्वकपको उपाधि जित्न सकेका छन्। त्यसमध्ये वेस्ट इन्डिज, इङ्ल्यान्ड र भारतले दुई–दुईपटक विश्वकप जितेका छन्।
भारतले सन् २००७ र सन् २०२४ मा उपाधि जितेको थियो। वेस्ट इन्डिजले सन् २०१२ र सन् २०१६ तथा इङ्ल्यान्डले सन् २०१० र सन् २०२२ मा उपाधि चुमेका थिए। यसैगरी, अस्ट्रेलिया, पाकिस्तान र श्रीलंकाले पनि एक–एकपटक उपाधि कुम्ल्याएका छन्। पाकिस्तानले सन् २००९, श्रीलंकाले सन् २०१४ र अस्ट्रेलियाले सन् २०२१ मा उपाधि जितेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
