काठमाडौं– केही दिनयता नेपालले बंगलादेशसँग टी–२० आई सिरिज खेल्ने चर्चा सामाजिक सञ्जालमा व्यापक छ। एसिया कप खेल्नुअघि बंगलादेशले नेपाल र नेदरल्यान्ड्समध्ये एउटा वा दुवै देशसँग त्रिकोणात्मक सिरिज खेल्ने खबर नेपाली क्रिकेट समर्थकहरुले सामाजिक सञ्जालमा लेखिरहेका छन्।
भारतले लिमिटेड ओभरको सिरिज स्थगन गरेपछि बंगलादेशले नेपाल र नेदरल्यान्ड्ससँग सिरिज खेल्ने कुरा आएको हो। बीसीबी क्रिकेट अपरेसन्स अध्यक्ष नजमुल अबेदिन फहीमले नेपाल र नेदरल्यान्ड्ससँग टी–२० सिरिज आयोजना गर्ने विषयमा छलफल भइरहेको बताएका थिए।
सोही कुरालाई लिएर नेपाली क्रिकेट समर्थकहरुले बंगलादेशसँग नेपालले सिरिज खेल्न लागेको हो? भन्ने खुल्दुली बढेको छ।
तर यता नेपाल क्रिकेट संघ क्यानले यस विषयमा कुनै पनि आधिकारिक खबर सार्वजनिक गरेको छ। नेपाल यतिबेला टी–२० विश्वकप छनोटको तयारीका लागि आधा टोली भारत र आधा नेपालमा प्रशिक्षण गरिरहेको छ।
केही दिनमा नै नेपाल अस्ट्रेलियामा अगस्ट १४ देखि २४ सम्म डार्विनमा आयोजना हुने टप एन्ड टी–२० सिरिजमा सहभागी हुन जाने तयारीमा छन्।
क्यानका प्रवक्ता छुम्बी लामाले अहिले बंगलादेशसँगको सिरिजका विषयमा कुनै निर्णय नभएको बताएका छन्। ‘बीसीबीका अध्यक्षले कुनै कार्यक्रममा बोलेको कुरालाई लिएर चर्चा बढेको हो। तर क्यानसँग कुनै पनि आधिकारिक प्रस्ताव आएको छैन,’ उनले भने।
नेपाली टोली अहिले विश्वकप तयारीका लागि व्यस्त रहेकाले पहिला तय भएका खेलबाहेक अन्य कुनै सिरिज खेल्न नसक्ने उनको भनाइ छ। ‘केही दिनमै नेपाली टोली अस्ट्रेलिया जाँदैछ। अहिले दुई ठाउँमा प्रशिक्षणमा व्यस्त पनि छ। अहिले नै अर्को सिरिजका लागि समय पनि हुँदैन,’ उनले भने।
उनका अनुसार सामाजिक सञ्जालमा आएका कुराहरु सबै भ्रामक हुन्। ‘सामाजिक सञ्जालमा जे जति आएका छन्। ती समर्थक आफैंले लेखेका कुराहरु हुन्। बंगलादेशले क्यानसँग यस विषयमा कुनै कुराकानी पनि गरेको छैन।’
पाकिस्तानविरुद्ध अन्तिम टी–२० खेलपछि बंगलादेशका कप्तान लिटन दासले एसिया कपअघि थप एक अन्तर्राष्ट्रिय सिरिज खेल्न पाए टिमलाई निकै सहयोग हुने प्रतिक्रिया दिएका थिए।
तर, अधिकांश अन्तर्राष्ट्रिय टोलीको अगस्ट महिनामा व्यस्त तालिकामा छ, जसका कारण अर्को सिरिज तय गर्न गाह्रो भइरहेको छ। ‘भारत नआउने भएपछि हामी अर्को टोली ल्याउने सम्भावनाबारे हेर्दैछौं,’ फहीमले भनेका थिए, ‘ठूला टोलीहरू व्यस्त छन्, त्यसैले सानासँग सिरिज खेल्न प्रयास गर्दैछौं। नेपाल वा नेदरल्यान्ड्ससँग सम्भावना देखिएको छ। हामी प्रयास गरिरहेका छौं। यद्यपि, उनीहरू सहमत हुन्छन् कि हुँदैनन् भन्ने अहिले भन्न सकिन्न।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773643707.png)
-1764146706.png)
