काठमाडौं –आइसिसी विश्वकप लिग–२ अन्तर्गत नेपाल, स्कटल्यान्ड र नेदरल्यान्ड्सबीचको सिरिजमा नेपालले तेस्रो जित निकालेको छ । मंगलबार भएको आफ्नो अन्तिम तथा चौथो खेलमा नेपालले नेदरल्यान्ड्समाथि १६ रनको सनसनीपूर्ण जित निकालेको हो ।
नेपालले दिएको २३७ रनको लक्ष्य पछ्याएको नेदरल्यान्ड्स ४९.२ ओभरमा २२० रनमा अलआउट भयो । नेपाललाई १० रन पेनाल्टी दिएपछि ब्याटिङ नै सुरु नगरी १० रन जोडेको नेदरल्यान्ड्सका लागि वेस्ली वारेसीले सबैभन्दा बढी ३६ रन जोडे ।
नेपालको जितमा डेब्यू खेलाडी नन्दन यादवले ३ विकेट लिन सफल भए । तीव्र गतिका बलर नन्दनले ९ ओभरमा १ मेडन राख्दा ३९ रन मात्र खर्चिए । यस्तै स्पिनर सन्दीप लामिछानेले पनि ३ विकेट लिए । उनले १० ओभरमा ३९ रन दिएर महत्वपूर्ण ३ विकेट लिएका थिए । ललित राजवंशीले १० ओभरमा १ मेडन राख्दा २९ रन मात्र खर्चिए भने २ विकेट लिन सफल भए । यस्तै कुशल भुर्तेल र करण केसीले १/१ विकेट लिएका थिए ।
स्कटल्यान्डको डन्डीमा टस जितेको नेदरल्यान्ड्सले फिल्डिङ रोजेपछि पहिले ब्याटिङ गरेको नेपालले ९ विकेटको क्षतिमा २३६ रन जोडेको थियो । नेपालका लागि आरिफ शेखले अर्धशतक प्रहार गरे । आरिफले ८५ बलमा ७ चौका र २ छक्काको मद्दतमा ८४ रन जोडे ।
ओपनरद्वय कुशल भुर्तेल १८ रन र अनिल साह २ रनमा आउट भए । सिरिजमा पहिलो अवसर पाएका अनिलले १६ बल खेल्दा निकै दबाब महसुस गरे ।
सात ओभरमा दुई विकेट गुमाएको नेपालका लागि भीम सार्की र कप्तान रोहित पौडेलले तेस्रो विकेटका लागि ५९ रनको साझेदारी गरे । भीम सार्की ३८ बलमा ३ चौकाको मद्दतमा ३५ रन जोडेर आउट भए । रोहितले ६० बलमा ३५ रन जोड्न सके ।
आजको खेलमा मौका पाएका अलराउन्डर बसिर अहमदले ११ रन जोड्न सके । करण केसीले पनि ११ रन मात्र बनाउन सके । नन्दन यादवले नटआउट १० रन बनाउँदा अन्तिम बलमा रनआउट भएका सन्दीप लामिछानेले २ रन बनाए ।
बलिङमा नेदरल्यान्ड्स लागि पल भानले ४ विकेट लिन सफल भए । माइकल लेभिटले ३ विकेट हात पार्दा आर्यन दत्तले १ विकेट लिए । नेदरल्यान्ड्सले ब्याटिङ नै सुरु नगरी १० रन पाएको थियो । मध्यओभरमा बसिर अहमद निषेध गरिएको पीच क्षेत्रमा दौडिएको भन्दै नेपाललाई १० रन पेनाल्टी दिइएको हो । यस अघिको खेलमा नेपाल स्कटल्याण्डसँग दुई रनले पराजित भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
