काठमाडौँ – मुम्बई इन्डियन्सले आईपीएल २०२५ को एलिमिनेटर खेलमा गुजरात टाइटन्सलाई २० रनले हराउँदै पन्जाब संगको भेट पक्का गरेको छ । जितका लागि २२९ रनको लक्ष्य पाएको गुजरात ६ विकेटको क्षतिमा २०८ रनमा समेटियो । एलिमिनेटर खेलमा मुम्बई इन्डियन्सले गुजरातलाई २० रनले हराएसँगै क्वालिफायर–२ मा स्थान सुरक्षित गरेको छ । जहाँ उसले १ जुन आइतबार फाइनलका लागि पञ्जाब किङ्ससँग खेल्नेछ ।
मुम्बईले नयाँ चण्डीगढस्थित महाराजा यादवेन्द्र सिंह अन्तर्राष्ट्रिय रंगशालामा टस जितेर ब्याटिङ रोजेको थियो । टोलीले २० ओभरमा ५ विकेट गुमाएर २२८ रन बनाएको थियो । रोहित शर्माले ५० बलमा ८१ रनको शानदार इनिङ खेले । उनले ९ चौका र ४ छक्का पनि हाने । रोहितबाहेक जोनी बेयरस्टोले ४७, सूर्यकुमार यादवले ३३, तिलक वर्माले २५, र कप्तान हार्दिक पाण्ड्याले अविजित २२ रन बनाएका थिए ।
जवाफी इनिङमा गुजरातले २० ओभरमा ६ विकेट गुमाउँदै २०८ रन मात्र बनाउन सक्यो । अन्तिम क्रममा राहुल तेवतिया र शाहरुख खान क्रिजमा थिए । ट्रेन्ट बोल्टले १९औँ ओभरको पहिलो बलमै शेर्फन रदरफोर्डलाई तिलक वर्माबाट क्याच गराए । उनले पहिलो ओभरमै कप्तान शुभमन गिललाई (१ रन) एलबीडब्लू आउट गरेका थिए ।
साई सुदर्शनलाई (८० रन) रिचर्ड ग्लीसनले क्लीन बोल्ड गरे । वाशिङ्गटन सुन्दर (४८ रन) लाई जसप्रीत बुमराहले योर्कर बलमा बोल्ड गरे । बल रोकेर बचाउने प्रयासमा सुन्दर क्रिजमै लडे । कुसल मेन्डिस (२० रन) मिचेल स्यान्टनरको ओभरमा हिट विकेट भएर आउट भए । पराजित गुजरातका प्रसिद्ध कृष्णा र साई किशोरले समान २–२ विकेट लिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789792206.jpg)
-1786602170.png)
