काठमाडौँ – पूर्व गभर्नर तथा वरिष्ठ अर्थशास्त्री डा. चिरञ्जीवी नेपालले भारत र पाकिस्तानबिच बढ्दो तनावले नेपालमा गम्भीर आर्थिक संकट ल्याउने खतरा रहेको बताएका छन्।
पूर्व सांसद मञ्चद्वारा आयोजित एक कार्यक्रममा बोल्दै उनले नेपाल भारतमाथि अत्यधिक निर्भर रहेको बताउँदै यदि भारत–पाकिस्तानबिचको द्वन्द्व लम्बियो भने यसको प्रत्यक्ष असर नेपाली अर्थतन्त्रमा पर्न सक्ने चेतावनी दिएका हुन्।
‘हामी परनिर्भर मात्र होइन, भारत निर्भर छौँ। यस्तो अवस्थामा छिमेकी राष्ट्रमा युद्ध भएमा त्यसको प्रभाव नेपालमा पर्ने निश्चित छ,’ उनले भने।
नेपाल भूकम्प र कोभिड महामारीपछिको पुनर्स्थापनाको चरणमा रहेको अवस्थामा यस्तो सम्भावित संकटले देशलाई पुनः धक्का दिने उनले उल्लेख गरे। सरकारले नीति तथा कार्यक्रम र बजेट निर्माणको तयारी गरिरहेको सन्दर्भमा उनले आगामी चुनौतीलाई ध्यानमा राखी बजेट बनाउनु पर्ने सुझाव दिए।
पूर्व गभर्नर नेपालले देशमा हालै ६ सय अर्ब रुपैयाँ बैंकमा थुप्रिएको भए तापनि सरकारले त्यो रकम प्रभावकारी रूपमा खर्च गर्न नसकेको भन्दै आलोचना गरे। ‘सरकारले लगानीको सही दिशा निर्धारण गर्न सकेको छैन, विकास खर्च बढाउन जरुरी छ,’ उनले भने।
उद्योग क्षेत्रमा सरकारी लगानी न्यून रहेको उल्लेख गर्दै उनले आर्थिक मन्दीको स्थितिबाट निस्कन विशेष योजना ल्याउनुपर्नेमा जोड दिए। उनले रेमिट्यान्सलाई मात्र आधार मानेर ढुक्क हुन नमिल्ने भन्दै उनले भने, ‘देशको राजनीतिक स्थिति, खराब कर्जा, र कमजोर लगानी प्रवृत्तिले हामीलाई थप संकटमा पुर्याउने सम्भावना छ। सरकारले अब गम्भीर भएर रणनीति बनाउनुपर्छ ।’
डा. नेपालले सरकारले जनताको मन जित्न नसकेको, नीति कार्यान्वयनमा कमजोरी रहेको र आर्थिक संरचनालाई दिगो बनाउनेतर्फ ध्यान दिन आवश्यक रहेको बताए। सरकारले आर्थिक संकटको सम्भावित जोखिमलाई मध्यनजर गर्दै पूर्व तयारी थाल्नु पर्नेमा उनले विशेष जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
