काठमाडौं – सरकार र आन्दोलनरत शिक्षकबीच आज (शनिबार) बिहान निर्णायक वार्ता हुँदैछ । शिक्षा मन्त्रालयले हिजै शिक्षकहरूसँग वार्ता तय गरेको थियो ।
तर, वार्ताको लागि सिंहदरबार गेटमा पुगेका शिक्षक महासंघका अध्यक्ष लक्ष्मीकिशोर सुवेदीसहितका प्रतिनिधि सिंहदरबार प्रवेश पास नपाएपछि फर्किएका थिए । तत्काल नयाँ शिक्षा ऐन ल्याउनु पर्ने मागसहित विगत २५ दिनदेखि देशैभरिका शिक्षकले काठमाडौंमा आन्दोलन गर्दै आएका छन् ।
सरकारसँग वार्ताको तयारी भैरहेका बेला आन्दोलन पनि जारी नै रहने भएको छ । आज पनि आन्दोलन जारी रहने शिक्षक महासंघका अध्यक्ष लक्ष्मिकिशोर सुवेदीले जानकारी दिएका छन् ।
उनले सधै जस्तो बिहान ११ बजे माइतीघर मण्डला आइपुग्न शिक्षकहरूलाई आग्रह गरेका छन् । ‘थुप्रै असजिला छन् । आन्दोलन आफैंमा कठिन कार्य हो तर यसपटक हामी वार कि पारको लडाईंमा छौं भन्ने बुझिदिनुहोला,’ उनले भनेका छन्, ‘गाउँघरमै रहनु भएका साथीहरू यो आन्दोलनले तपाईंलाई खोजिरहेको छ । सँगैका साथी आन्दोलनको मोर्चामा डटिरहँदा तपाईको कर्तव्य के होला, एकपटक आफैंलाई सोध्नुहोला । हामी निर्णायक र अन्तिम लडाईंमा छौं । यस्तोबेला नियमितभन्दा बढी बल लगाउनु पर्छ । यो कुरालाई मननगरी सहभागिता बढाउनुहोला ।’ उनले माग पुरा नभए सम्म कुनै हालतमा पनि आन्दोलन नरोकिने पुनः स्पष्ट पारेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786357084.jpg)
-1764146706.png)
-1786184812.png)
