काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले प्रतिगामीहरुलाई राम्रैसँग जवाफ दिनुपर्ने भएकाले १५ गते काठमाडौंमा प्रदर्शनको कार्यक्रम राखेको बताएका छन् ।
पर्साको ठोरी गाउँपालिकामा आयोजित खबरदारी सभालाई सम्बोधन गर्दै आफूहरुको विरोध सभाले सरकारको पनि चेत खुलाउने बताए ।
उनले भने, ‘यो सरकार सुशासन कायम गर्न होइन, भ्रष्टाचारी बचाउन बनेको हो । यो कुरा हामी सबैले देखिसकेका छौं । हामीले सडक र सदनबाट खबरदारी गर्याैं तर त्यतिले सरकारको चेत आएको छैन । त्यसकारण अलि ठूलो खबरदारी गर्ने भनेर आउने १५ गते काठमाडौंमा विरोध र खबरदारी सभा गर्दैर्छौं । हाम्रो खबरदारीलाई सरकारले त्यति ध्यान दिएको छैन ।’
उनले सरकारले गलत काम गर्दै गएकाले केही प्रतिगामी शक्तिहरु सलबलाउन खोजेको बताए ।
उनले भने, ‘त्यसकारण सरकारलाई अझै खबरदारी गर्न र प्रतिगामीहरुलाई राम्रैसँग जवाफ दिनुपर्ने भएकाले १५ गते कार्यक्रम राखेका छौं । त्यसमा तपाईंहरू पनि ठूलो संख्यामा उपस्थित हुन आग्रह गर्दछु ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
