काठमाडौं–लुम्बिनीमा जारी प्रधानमन्त्री कप एक दिवसीय पुरुष राष्ट्रिय क्रिकेट प्रतियोगिता अन्तर्गत कर्णाली प्रदेशले मधेश प्रदेशलाई ८१ रनको फराकिलो अन्तरले हराउँदै चौथो जित निकालेको छ ।
कर्णालीले दिएको २२१ रनको लक्ष्य पछ्याउने क्रममा मधेश प्रदेश ३५ दशमलव १ ओभरमा अलआउट हुँदै १३९ रनमै समेटियो ।
कर्णालीका लागि दिनेश अधिकारी र दीपेन्द्र रावतले उत्कृष्ट प्रदर्शन गरे । बलिङ र ब्याटिङमा उनीहरुको प्रदर्शनकै कारण बलियो मधेशमाथि रन अन्तरको शानदार जित निकालेको हो ।
मधेशका लागि रुपेश सिंहले सर्वाधिक ३० रन बनाए । यस्तै विशाल पटेलले २५, शैलेन्द्र साहले १०, हरिशंकर साहले १८ रन बनाउनुबाहेक अन्य ब्याटरले दोहोरो अंकमा रन बनाउन सकेनन् ।
कर्णालीको जितमा दिनेश अधिकारीले उत्कृष्ट बलिङ गर्दै १० ओभरमा ४१ रन खर्चिएर ४ विकेट लिए । यस्तै दीपेन्द्र रावतले ३ विकेट लिँदा प्रकाश जैशीले २ र सुनिल धमलाले एक विकेट लिए ।
त्यसअघि टस जितेर पहिले ब्याटिङ गरेको कर्णालीले ४९ दशमलव १ ओभरमा अलआउट हुँदै २२० रनको स्कोर बएको थियो । टप अर्डरका ब्याटर चाँडै आउट भए पनि तल्लो क्रमले कर्णालीको स्कोर सम्हाल्यो ।
आठौं विकेटका लागि दीपेन्द्र रावत र दिनेश अधिकारीले ६० रनको साझेदारी गरेका थिए । दीपेन्द्रले व्यक्तिगत रुपमा भने आज अर्धशतक बनाए । ९२ बलमा खेलेका उनले ६१ रनको योगदान दिए ।
अर्जुन घर्तीले २६ रन बनाउँदा दिनेश अधिकारीले २४, प्रकाश जैशीले २०, दिवान पुनले नटआउट १८ र ओपनर रविन्द्रजंग शाहीले १३ रन बनाएका थिए ।
बलिङतर्फ मधेशका रुपेश सिंह, रञ्जित कुमार , हरिशंकर साह, अनिलकुमार साह र कमल गुप्ताले समान २/२ विकेट लिए ।
पहिलो रनमै विकेट गुमाएको कर्णालीले १०३ को स्कोरसम्म पुग्दा ६ विकेट गुमाइसकेको थियो । त्यसपछि दीपनेद्र र दिनेशले ६० रनको साझेदारी गर्दै टिमलाई अगाडी बढाएका थिए ।
कर्णालीको आजको सातौं खेलमा चौथो जित हो । यससँगै शीर्ष चारको भीडन्तमा कर्णालीले इन्ट्री गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1776332923.jpg)
-1764146706.png)
