बुटवल– नेकपा माओवादी केन्द्रका उपमहासचिव वर्षमान पुन अनन्तले सत्तारुढ नेपाली कांग्रेस र नेकपा एमालेको नालायकीका कारण इतिहास भइरहेको सामन्ती राजतन्त्रले टाउको उठाउने जमर्को गरेको बताएका छन् ।
मगर राष्ट्रिय मुक्ति मोर्चाको छैटौं राष्ट्रिय सम्मेलनको उद्घाटन समारोहलाई मंगलबार रुपन्देहीमा सम्बोधन गर्दै पुनले कांग्रेस–एमाले सरकारमा कुशासन, भ्रष्टाचार र बेथिति बढेको बताए । उनले सरकारको असफलताको कारण निरंकुश राजावादीले इतिहास भइसकेको पुरानै स्वर्ग फर्काउन सकिन्छ कि भन्ने प्रयत्न गरेको पुनको भनाइ छ ।
‘दुईतिहाइ गठबन्धनको नाममा सरकार चलाएका दुई दलले बिचौलिया वर्ग, स्वार्थ समूह र आफ्नो पार्टीको पनि सीमित गुटको स्वार्थमा सत्ताको दुरुपयोग गरिरहेका छन्,’ पुनले भने, ‘शासनमा रहेकाहरुको नालायकीको फाइदा उठाएर निरंकुशतावादी प्रतिगामी शक्तिहरूले टाउको उठाउने कोसिस गरिराखेका छन् । मुलुकका लागि यी दुवै प्रवृत्ति घातक छन् ।’
जनताको बलिदानीपूर्ण संघर्ष र त्यागबाट प्राप्त लोकतान्त्रिक गणतन्त्रलाई दलाल तथा पुँजीपति र बिचौलिया वर्गले सत्ता स्वार्थमा प्रयोग गरेका कारण युवामा निराशा बढेको उनले टिप्पणी गरे ।
पुनले माओवादीले जनयुद्ध लडेर ल्याएको गणतन्त्र, संघीयता, समेवेशीता तथा उत्पीडित जाति, क्षेत्र, वर्ग, लिंगका अधिकार रक्षाको दायित्व पनि माओवादीकै भएको धारणा राखे । उनले परितर्वनमाथि धावा बोल्ने दक्षिणवादी प्रवृत्ति र यथास्थितिवादी शक्तिविरुद्ध एकैसाथ प्रहार गर्ने नीतिसहित आफूहरू अगाडि बढ्ने उल्लेख गरे ।
‘दलाल तथा बिचौलिायहरूलाई प्रोत्साहन गर्ने कांग्रस र एमालेको सरकारले जनतामा र त्यसमा पनि युवाहरूमा निराशा बाँडेको छ,’ उनले भने, ‘आन्दोलनमार्फत किसान, महिला, मजदुर, उत्पीडित, जाति, क्षेत्र र वर्गले प्राप्त गरेको अधिकार रक्षा गर्ने र थप सशक्त गर्दै अगाडि बढ्ने जिम्मेवारी हाम्रो काँधमा आएको छ ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
