काठमाडौँ– त्रिभुवन विश्वविद्यालयको केन्द्रीय क्याम्पस (प्रिन्सिपल कार्यालय) मा नेपाल विद्यार्थी सङ्घको एउटा पक्षले तालाबन्दी गरेको छ।
स्ववियु निर्वाचनका लागि आफ्नो तर्फबाट सिफारिस भएका उम्मेदवारको उम्मेद्वारी खारेज गरिएको भन्दै त्रिवि समिति सभापति विष्णु बडैलासहितको टोलीले तालाबन्दी गरेका हुन्।
स्ववियु निर्वाचनका लागि आधिकारिक उम्मेदवार अनुज कार्की भएको तर, अर्का उम्मेदवार दीपक जोशीको उम्मेदवारी सदर गरिएको भन्दै तालाबन्दी गरिएको सभापति बडैलाले जानकारी दिए। हिजो मङ्गलवार स्ववियु निर्वाचनका लागि मनोनयन दर्ता गर्ने समय तोकिएको थियो।
सोही क्रममा नेविसंघको तर्फबाट उम्मेदवारका विषयमा नेपाली कांग्रेसका महामन्त्री तथा स्ववियु केन्द्रीय परिचालन समितिका संयोजक विश्वप्रकाश शर्मा र नेपाली कांग्रेसका सहमहामन्त्री तथा नेविसंघका निर्देशक समिति संयोजक र स्ववियु टिकट वितरण समितिका संयोजकको निर्देशन अनुसार आफूहरू अनुज कार्कीको उम्मेदवारी मनोनयन दर्ता गराएको उनको भनाइ छ।
त्रिभुवन विश्वविद्यालयको समितिबाट स्ववियु निर्वाचनका लागि आधिकारिक उम्मेदवार तय गरी अगाडि बढ्ने निर्देशन समितिले दिएको उनको भनाइ छ। सोही आधारमा आफूहरू स्ववियु अध्यक्षमा कार्कीको नेतृत्वमा मनोनयन दर्ता गरिएको बताए।
त्यसपछि नेविसंघ केन्द्रीय समितिको टिकट भन्दै नक्कली नक्कली हस्ताक्षर र छाप लगाएर तोकिएको समय निर्वाचन आचारसंहिता अनुसार ५ बजेपछि जोशीले मनोनयन दर्ता गराएको त्रिवि नेविसंघको आरोप छ।
समयसीमा कटिसकेपछि दिइएको निवेदनलाई विश्वविद्यालय क्याम्पसका निर्वाचन अधिकृतले दर्ता गराएकाले उक्त क्रियाकलाप निर्वाचनको आचारसंहिता विपरित भएको सभापति बडैलाले बताए। उक्त कुरा नसच्याइएसम्म अनिश्चितकालीन रूपमा तालाबन्दी गरिएको सभापति बडैलाले बताए। विद्यार्थीहरूको प्रतिनिधि चुन्ने एक मात्र संस्था स्ववियु निर्वाचनको ग्यारेन्टी गर्न समेत गमा गरे।
आचारसंहिता विपरीतका क्रियाकलापहरूलाई बढवा दिँदै समिति अगाडि बढेमा नेविसंघ त्रिवि समिति थप आक्रामक गतिविधि बढाउने समेत चेतावनी दिए। त्रिवि केन्द्रीय क्याम्पसका लागि नेविसंघका सात जनाले बागी उम्मेदवारी दिएका छन्। नरेन्द्र साउद, स्ववियु कोषाध्यक्ष पद्मा भुसाल, अक्कलदेव रानाभाट, सनम ओली, पदम दाहाल लगायतले स्वतन्त्र उम्मेदवारी दिएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
