काठमाडौं– आइतबारदेखि लुम्बिनी प्रदेशमा सुरु भएको प्रधानमन्त्री कप एक दिवसीय पुरुष राष्ट्रिय क्रिक्रट प्रतियोगिताको तेस्रो खेलमा लुम्बिनी प्रदेशले कोशी प्रदेशविरुद्ध २६ रनको जित निकालेको छ ।
पहिले ब्याटिङ गर्दै दिएको २०९ रनको लक्ष्य पछ्याउने क्रममा कोशी प्रदेश ४२ दशमलव ४ ओभरमा अलआउट हुँदै १८२ रनमा समेटियो ।
कोशीका लागि सुजन थपलियाले सर्वाधिक ३५ रन बनाए । यस्तै चिराग साहले ३१ रन बनाउँदा सुमन गहतराजले २९ रन बनाए । बलिङतर्फ लुम्बिनीका प्रकाश कार्की र दीपेश कँडेलले ३/३ विकेट लिँदा फिरदोश अन्सारीले २ विकेट लिए ।
यता टस जितेर पहिले ब्याटिङ गरेको लुम्बिनीले ४८ ओभरमा सबै विकेट गुमाउँदै २०८ रन बनायो । लुम्बिनीका लागि आकाश त्रिपाठीले ६३ रनको अर्धशतकीय इनिङ्स खेले । नरबहादुर सार्कीले ४५ तथा मृनाल गुरुङले ४३ रन बनाए ।
बलिङतर्फ कोशीका अजय चौहानले ५ विकेट लिँदा रमेश कुर्मीले ३ तथा देव खनालले एक विकेट लिए ।
यसअघि भएका दुई खेलमा बागमतीविरुद्ध एपीएफले १०० रनको फराकिलो जित निकाल्यो भने उद्घाटन खेलमा कर्णालीले सुदूरपश्चिम प्रदेशलाई ७९ रनको फराकिलो अन्तरले पराजित गर्यो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
