नेपालगन्ज– बाँकेको बैजनाथमा भएको एक बिहे समारोहमा खुकुरी प्रहारबाट घाइते एक जनाको मृत्यु भएको छ । बैजनाथ गाउँपालिका–८ स्थित पुष्पनगर बीचलाइनमा भएको 'ग्याङ फाइट'मा खुकुरी प्रहारबाट घाइते भएका स्थानीय दिनेश रोकायाको उपचारका क्रममा भारतको लखनउमा मृत्यु भएको प्रहरीले जनाएको छ ।
जिल्ला प्रहरी कार्यालय बाँकेका प्रहरी प्रवक्ता डीएसपी आयुषप्रसाद जोशीका अनुसार २५ वर्षीय रोकायको भारतको लखनउमा उपचारको क्रममा आइतबार मृत्यु भएको थियो । घाइते अन्य ५ जनाको मेडिकल कलेज कोहलपुरमा उपचार भइरहेको छ ।
जिल्ला प्रहरी कार्यालय बाँकेका अनुसार स्थानीय युवा सुवास बुढाको बिहेपछि दुलही भित्र्याउने क्रममा रमाइलो चलिरहेको अवस्थामा मदिरा पिएका युवाहरूबीच 'ग्याङ फाइट' भएको थियो । दुलही भित्र्याएपछि नाचगान चलिरहेको समयमा रामबहादुर रानाको समूह र छिमेकी युवक दिनेश रोकायाको समूहबीच विवाद बढ्दै जाँदा कुटपिट भएको थियो ।
डीएसपी जोशीका अनुसार प्रहरीले हत्यामा संलग्न रहेको आरोपमा दुलाहाको भिनाजु ३५ वर्षीय रामबहादुर रानासहित ६ जनालाई पक्राउ गरेको छ । पक्राउ पर्नेमा बैजनाथ-२ की ३० वर्षीया मनीषा राना, बैजनाथ-६ का १८ वर्षीय भिजन नेपाली, जाजरकोट शिवालय-७ घर भई बजैनाथमा पाहुना आएका २९ वर्षीय हिमबहादुर बुढा, दाङ बबई गाउँपालिका-६ घर भई पाहुना आएकी २७ वर्षीय अमृता डाँगी र बैजनाथ-८ का १८ वर्षीय सुजन बुढा रहेका छन् ।
पक्राउ परेकाहरूलाई कर्तव्य ज्यान मुद्दामा म्याद थपेर अनुसन्धान थालिएको जिल्लाका प्रहरी प्रवक्ता डीएसपी जोशीले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
