धनगढी– कुशल भूर्तेलको अलराउन्ड प्रदर्शनमा फ्रेन्ड्स युथ क्लब डडेलधुरा अर्जुन ट्रफी राष्ट्रिय क्रिकेट प्रतियोगिताको फाइनलमा पुगेको छ । नेपाली राष्ट्रिय टोलीका ओपनिङ ब्याटर कुशलको अलराउन्ड प्रदर्शनमा डडेलधुराले शनिबार न्यु होराइजन बुटवललाई ५ विकेटले पराजित गरेको हो ।
कुशलले सानदार बलिङ प्रदर्शन गर्दै ५ विकेट लिएपछि फाप्ला क्रिकेट मैदानमा टस जितेर ब्याटिङ रोजेको न्यु होराइजन १६.१ ओभरमै ८२ रनमा अलआउट भयो । आरिफ खानले १६ बलमा २ चौका र १ छक्का प्रहार गरी २०, दीपक डुम्रेले ३२ बलमा बिनाबाउन्ड्री १८ र निश्चल ज्ञवालीले १४ रन बनाए ।
कप्तान दिलीप नाथ १, प्रतीक श्रेष्ठ ३, विप्रसन केसी र निर्मल गुरुङ समान ४ रनमा आउट भए । तुलबहादुर थापा, महेश भार र प्रिन्स पालले खाता खोल्न सकेनन् । प्लेयर अफ द म्याच कुशलले ३.१ ओभरमा १९ रन खर्चेर ५ विकेट लिए । अजय चौहानले ४ ओभरमा १ मेडन राख्दै ७ रन खर्चेर ३ तथा हेमन्त धामी र अशोक धामीले १–१ विकेट लिए ।
कुशलले ४६ रन बनाएपछि डडेलधुराले १६ ओभरमा लक्ष्य पूरा गर्यो । कुशल २६ बल खेली ६ चौका र २ छक्का प्रहार गरी पहिलो विकेटका रूपमा आउट हुँदा सातौं ओभरमा टोलीको स्कोर ५६ रन रहेको थियो । तर त्यसपछि विनोद भण्डारी, नरेन्द्र राणा र अशोक धामी समान १ र ओपनर आयुषमान बम २८ बलमा १६ रन बनाई आउट हुँदा डडेलधुरा १२ औं ओभरमा ६९–५ को स्थितिमा पुगेको थियो ।
तर कप्तान सन्दीप जोराले ६ र किरण ठगुन्नाले अविजित ८ रन बनाई डडेलधुरालाई थप क्षति हुन दिएनन् । न्यु होराइजनका प्रिन्सले ४ ओभरमा १६ रन खर्चेर ३ तथा निर्मल र महेशले १–१ विकेट लिए ।
गो ड्रिमर्सको आयोजनामा नेपाल क्रिकेट संघको वार्षिक क्यालेन्डरमा समावेश प्रतियोगितामा सोमबार समूह ‘ए’ को विजेता सीवाईसी अत्तरिया र समूह ‘बी’ को उपविजेता डीसीए धनगढीबीच खेल हुनेछ ।
दीपेन्द्रले धनगढीबाट खेल्ने
नेपाली राष्ट्रिय टोलीका अलराउन्डर दीपेन्द्रसिंह ऐरीले डीसीए धनगढीबाट अर्जुन ट्रफी खेल्ने भएको आयोजकले जनाएको छ । युएईमा भएको इन्टरनेसनल लिग ट्वान्टी–२० मा गल्फ जायन्टमा आबद्ध दीपेन्द्र शनिबार साँझ धनगढी आइपुगेका हुन् ।
उनी आइतबार धनगढीबाट सीवाईसी अत्तरियाविरुद्धको सेमिफाइनलमा उत्रिने छन् । धनगढीको ‘ए’ क्याटेगरीको खेलाडीमा दीपेन्द्रसहित ललित राजवंशी, लोकेश बम रहेका छन् । अत्तरियाबाट विवेक यादव, भीम सार्की, शाहव आलम, रशिद खान, दीपेश कँडेललगायत खेलाडी छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766980460.png)
-1764146706.png)
-1766928868.png)
-1766648928.png)
