काठमाडौं– मंगलबार नेप्से परिसूचक दोहोरो अंकले घटेको छ। नेप्से १४.०८ अंकले घटेर २७१५.९१ विन्दुमा बन्द भएको छ।
यसदिन कारोबार रकम पनि अघिल्लो दिनको तुलनामा घटेको छ। गत कारोबार दिन अर्थात् सोमबार ११ अर्ब ८७ करोडको कारोबार भएकोमा मंगलबार आठ अर्ब ९१ करोडको सेयर कारोबार भएको छ।
अघिल्लो दिनको तुलनामा कारोबार रकममा दुई अर्ब ९६ करोड रूपैयाँ कमी आएको हो। आज ३१५ वटा धितोपत्रको एक करोड ६९ लाख १७ हजार ८३५ कित्ता सेयर किनबेच भएको हो।
मंगलबार ७१ कम्पनीको सेयर मूल्य बढेको छ भने १६२ वटाको घटेको छ। यस्तै नौ कम्पनीको मूल्य स्थिर रहेको छ।
यसदिन जोशी हाइड्रोपावरको सेयर मूल्य सर्वाधिक ९.९८ प्रतिशतले बढेको छ। उक्त कम्पनीको प्रतिकित्ता मूल्य ४५१ रूपैयाँ ८० पैसा पुगेको छ।
यस्तै, सामुदायिक लघुवित्तको मूल्य ८.३० प्रतिशतले बढेर प्रतिकित्ता मूल्य तीन हजार रूपैयाँ कायम भएको छ। मंगलबार चार कम्पनीको मूल्यमा नकारात्मक सर्किट लागेको छ।
कर्पोरेट डेभलपमेन्ट बैंक, ग्रीन डेभलपमेन्ट बैंक, सिन्धु विकास बैंकको सेयरमूल्य १० प्रतिशतका दरले घटेको छ भने सप्तकोशी डेभलपमेन्ट बैंकको मूल्य ९.९९ प्रतिशतले घटेको छ।
सोमबार एनआरएन इन्फ्रास्ट्रक्चरको सर्वाधिक कारोबार भएको छ। कम्पनीको प्रतिकित्ता मूल्य एक हजार ३४९ रूपैयाँ ८० पैसामा ३० करोड ८७ लाख रूपैयाँको सेयर कारोबार भएको छ।
यो मूल्य अघिल्लो दिनको तुलनामा ०.२८ प्रतिशत बढेको हो। सर्वाधिक सेयर खरिद–बिक्री हुने दोस्रो कम्पनीमा नेपाल पुनर्बीमा कम्पनी रहेको छ। उक्त कम्पनीको प्रतिकित्ता ९८८ रूपैयाँमा २६ करोड ८४ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये जलविद्युत र अन्य समूहको परिसूचक बढेको छ भने बाँकी ११ समूहको परिसूचक घटेको हो।
यसदिन विकास बैंक समूहको परिसूचक सर्वाधिक २.६० प्रतिशतले घटेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
