काठमाडौं– जारी नेपाल प्रिमियर लिगमा रोहितकुमार पौडेलको कप्तानीमा रहेको लुम्बिनी लायन्सले पहिलो जित दर्ता गरेको छ। लगातार चार खेल हारेको लुम्बिनीले आज चितवनमाथि पहिलो जित निकालेको हो।
लुम्बिनीको जितमा कप्तान पौडेलको प्रदर्शन उत्कृष्ट रह्यो। ब्याटिङ र बलिङमा उनको शानदार प्रदर्शनका कारण चितवनमाथि ३३ रनको फराकिलो जित निकालेको हो।
ब्याटिङमा ८० रनको पारी खेलेका पौडेलले बलिङमा पनि चार ओभरमा मात्र १७ रन खर्चिएर महत्त्वपूर्ण चार विकेट लिए।
लुम्बिनीले दिएको १६८ रनको लक्ष्य पछ्याउने क्रममा चितवन राइनोजले २० ओभरमा ८ विकेट गुमाउँदै १३४ रन मात्र बनाउन सक्यो।
चितवनका लागि ल्यूक बेन्केन्स्टिनले सर्वाधिक ३१ रन बनाउँदा कप्तान कुशल मल्लले २०, सन्तोष कार्कीले १०, रवि बोपाराले १२, रिजन ढकालले १५ र नर सार्कीले २२ रन बनाए।
बलिङमा लुम्बिनीका लागि कप्तान पौडेलले चार विकेट लिँदा रेमोन सिमोन्ड्सल २, सादविन जाफर र अभिशेष गौतमले एक/एक विकेट लिए।
त्यसअघि पहिले ब्याटिङ गरेको लुम्बिनीले २० ओभरमा ६ विकेट गुमाउँदै १६७ रन बनाएको थियो। लुम्बिनीको यो स्कोरका लागि कप्तान रोहित पौडेल र सादबिन जाफरले शतकीय साझेदारी गरे। दुवै खेलाडीले अर्धशतक प्रहार गरे।
पाँचौं विकेटका लागि उनीहरुले ७१ बलमा ११४ रनको साझेदारी गरे। दोस्रो ओभरमै दुई विकेट गुमाएर दबाबमा रहेको लुम्बिनीका लागि कप्तान पौडेल र जाफरले पारी सम्हाल्दै स्कोर उकासे।
सो क्रममा लुम्बिनीका लागि कप्तान पौडेलले सर्वाधिक ८० रनको योगदान दिए। ५७ बलमा उनले ६ चौका र पाँच छक्का प्रहार गरे। उनले ४२ बलमा अर्धशतक प्रहार गरेका थिए।
यस्तै सादबिन जाफरले पनि लुम्बिनीका लागि अर्धशतक प्रहार गरे। उनले ३५ बलमा ५२ रनको योगदान दिए। ओपनर अर्जुन साउदले १५ रन बनाउँदा टम मोर्सले १० रन बनाए।
लुम्बिनीले ओपनर आशुतोष घिरैयालाई एक रनमै गुमाएको थियो भने उन्मुक्त चन्द शून्यमै आउट भएका थिए। यी दुवैको विकेट दोस्रो ओभरमा चितवनका रिजन ढकालले लिएका हुन्।
यस्तै सन्दीप जोराले ४ रन बनाए। सुरुवाती पावर प्लेमा निकै खराबस्थितमा देखिएको लुम्बिनीका लागि पौडेल र जाफरले उकास्दै सम्मानजनक स्कोरसम्म पुर्याए।
यता चितवनका लागि रिजन ढकालले चार ओभरमा २९ रन खर्चिँदै ३ विकेट लिँदा कुशल मल्ल र रन्जित कुमारले एक/एक विकेट लिए। पाँचौं खेलसम्म आइपुग्दा लुम्बिनीले यो पहिलो जित निकाल्दै अंक तालिकामा २ अंक जोडेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768271809.png)
-1764146706.png)
