काठमाडौं– नेपालको क्रिकेट इतिहासमै सबैभन्दा ठूलो र भव्य टी–२० लिग नेपाल प्रिमियर लिग यही मंसिर १५ गतेदेखि सुरु भएको छ। जारी लिग नेपाल क्रिकेट संघले आफैं आयोजना गरेको छ।
डोमेस्टिक लेभलमा यसअघि धेरै लिगहरु भए पनि विश्वस्तरको लिग भने यो पहिलो हो। यसको हाइप यति धेरै छ कि नेपाली क्रिकेट र नेपाली क्रिकेटरका लागि नयाँ युगको सुरुवातका रुपमा क्रिकेट विश्लेषकहरुले लिएका छन्।
जारी लिगमा अहिलेसम्म १३ खेल सकिसकेका छन्। आठ टिम सहभागी प्रतियोगितामा सुदूरपश्चिम रोयल्स, कर्णाली याक्स, लुम्बिनी लायन्स, पोखरा एभेन्जर्स, चितवन राइनोज, काठमाडौं गुर्खाज्, जनकपुर बोल्टस् र विराटनगर किङ्स रहेका छन्।
यी टिममध्ये अहिलेसम्म विराटनगर किङ्स र कर्णाली याक्सले ४/४ खेल खेल्दा अन्य टीमले भने ३/३ खेल खेलेका छन्। अब कर्णाली र विराटनगरसँग समूहचरणमा ३/३ खेल रहँदा अन्यसँग चार चार खेल बाँकी छन्।
तीन खेलमा तीनै खेल जित्दै ६ अंकसहित सुदूरपश्चिम पहिलो र तीनै खेल जितेको जनकपुर बोल्ट्स दोस्रो स्थानमा रहेको छ। यता चितवन राइनोज तीन खेलमा २ जित र एक हारसहित ४ अंकका साथ तेस्रोमा रहेको छ।
दुई खेल जित र दुई हारसहित कर्णाली याक्स चार अंकसहित चौथो स्थानमा रहँदा पोखरा पाँचौं, काठमाडौं गुर्खाज् छैटौ, विराटनगर एक सातौं र अन्तिममा लुम्बिनी रहेको छ।
अब समूह चरणमा १५ खेल बाँकी छन्। समूह चरणमा शीर्ष चार टिम प्लेअफमा जानेछन्।
सुदूरपश्चिम र जनकपुरको सम्भावना बलियो
अहिलेसम्मको खेल हेर्दा शीर्षमा रहेको सुदूरपश्चिम र जनकपुर बोल्ट्स प्लेअफमा पुग्ने दुई प्रवल सम्भावनायुक्त टीम देखिएका छन्।
यी दुवैले लगातार तीन खेल खेलेका छन्। त्यो पनि उच्च रनरेटका साथ। सोही कारण अब बाँकी चार/चार खेलमध्ये एकाध गुमाए पनि यि दुई टिम त्यति दबाबमा रहने छैनन्।
भोलि जनकपुर र लुम्बिनी लायन्सले चौथो खेल खेल्दैछन्। लगातार तीन खेल जित्दै बलियो उपस्थिति बनाएको जनकपुरका अगाडी लुम्बिनी दबाबमा देखिन्छ। त्यसैले पनि आफ्नो फर्म कायम राख्दै मैदानमा उत्रियो भने लुम्बिनीमाथि जनकपुरले धेरै नै दबाब राख्न सक्छ।
यस्तै शीर्षमा रहेको सुदूरपश्चिम पनि त्यति दबाबमा देखिँदैन। किनकी एक खेल गुमाउँदा पनि सुदूरका लागि कमब्याक गर्ने अवसर हुनेछ।
अन्यको कस्तो छ अवस्था
यता दुई/दुई खेल जितेका कर्णाली याक्स र चितवन राइनोजबीच पनि प्लेअफमा पुग्नका लागि प्रतिस्पर्धा हुने देखिन्छ। तर चितवनले मात्र तीन खेल खेलेको छ। यदि पहिला दुई खेल जितेजसरी चितवनले आफ्नो फर्म कमब्याक गर्यो भने उसका लागि पनि सम्भावना बलियो हुनेछ।
तर यता कर्णाली पनि कम छैन। लगातार दुई खेल हारे पनि कर्णालीले पछिल्ला दुई खेल लगातार जितेर प्लेअफको दौडमा आफूलाई उभ्याएको छ।
यता पोखरा एभेन्जर्स पनि कमब्याक गर्न चाहन्छ। लगातार दुई खेल हारेपछि तेस्रो खेलमा सनसनीपूर्ण जित निकालेको पोखरा पनि दबाबमै छ। किनकी यसअघिका दुई खेल नराम्रोसँग पराजित भएको थियो।
तर सबैभन्दा महँगो र उत्कृष्ट खेलाडी रहेका पोखराले टिम व्यवस्थापन र खेलाडीको प्रयोगलाई राम्रो गर्नसक्यो भने प्लेअफ दौडको बलियो प्रतिस्पर्धी बनाउन सक्छ। किनकी पोखराको टिममा सनसनी मच्चाउन सक्ने अनेक खेलाडी छन्।
यता काठमाडौं गुर्खाज् छैटौ स्थानमा छ। करण केसीको कप्तानीमा रहेको काठमाडौंले दुई हार र एक जित निकालेको छ। तर रनरेट भने त्यति राम्रो छैन। प्ले अफ दौडमा प्रतिस्पर्धी बन्नका लागि भने उत्कृष्ट कमब्याक गर्नुपर्ने हुन्छ।
विराटनगर दबाबमा
यता राष्ट्रिय टोलीका लेग स्पिनर सन्दीप लामिछानेको कप्तानीमा रहेको विराटनगर किङ्स दबाबमा परेको छ। चार खेलमा तीन हारेको छ। प्लेअफका लागि उसले पनि पछाडीका सबै खेलमा उत्कृष्ट कमब्याक गर्नुपर्नेछ।
लुम्बिनीको सम्भावना क्षण बन्दै
नेपाली टोलीका कप्तानसमेत रहेका रोहितकुमार पौडेल कप्तान रहेको लुम्बिनी लायन्स भने सबैभन्दा दबाबमा रहेको छ। जारी लिगमा सबैले एक/एक जित निकाल्दा तीनै खेल हारेर अहिलेसम्म अंक तालिकामा खाता नखोल्दै पुछारमा रहेको छ।
राष्ट्रिय टोलीका सबैभन्दा धेरै खेलाडीसमेत रहेको लुम्बिनीले आफ्ना तीनै खेल हारेको छ। विराटनगरसँग एक विकेटले हारे पनि बाँकी दुई खेल लुम्बिनीले नराम्रोसँग हार्यो।
अब प्लेअफका लागि लुम्बिनीको सम्भावना क्षण बन्दै गएको छ। किनकी बाँकी रहेका चारै खेलमा राम्रो रनरेटसहित जित्नुपर्ने दबाब छ। जनकपुर, कर्णाली, काठमाडौं गुर्खाज् र चितवन राइनोजसँग उसले खेल्न बाँकी छ। यि सबै टोली त्यति कमजोर छैनन्।
अर्को क्षण बन्ने सम्भावना के हो भने लुम्बिनीमा अहिलेसम्मका खेल हेर्दा कुनै पनि इकोनोमिकल बलर छैनन्। र फिल्डिङ पनि अहिलेसम्मकै कमजोर देखिएको छ। एनपीएलमै ठूलो १९१ रनको स्कोर बनाए पनि त्यो लक्ष्य भेट्न नदिनका लागि लुम्बिनीका कुनै पनि बलरले विराटनगरलाई रोक्न सकेनन्। पहिला बलिङ गर्दा पनि कुनै बलरहरु इकोनोमिकल चल्न सकेका छैनन्।
यदि लुम्बिनीले आफ्नो राम्रो कमब्याक चाहने हो भने बाँकी सबै खेलहरुमा उत्कृष्ट प्रदर्शन गर्दै जित दर्ता गर्नुपर्ने हुन्छ। यद्दपी लुम्बिनी प्लेअफको प्रतिस्पर्धी बन्ने किन नबन्ने भन्ने कुरा भोलि जनकपुरसँगको खेलमा निर्धारण हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764170040.png)
-1764146706.png)
-1763721444.png)
-1763559424.jpg)
-1764080971.png)
