काठमाडौं– त्रिवि अन्तर्राष्ट्रिय क्रिकेट मैदानमा जारी सिद्धार्थ बैंक नेपाल प्रिमियर लिग (एनपीएल)को आजको खेल निकै रोमाञ्चक र अविस्मरणीय बन्यो। यसअघिका दुई खेलमा नराम्रो पराजय भोगेको लिगकै महँगो टिम पोखरा एभेन्जर्सले लुम्बिनीमाथि वर्षाएको रनका कारण रोमाञ्चकारी मात्र रहेन, अनेक रेकर्डहरुसमेत बने।
ब्याटिङ लाइनमा सबैभन्दा बलियो र आक्रामक देखिएको लुम्बिनीमाथि पोखराले जुन प्रकारको जित निकाल्यो सायद यो कालान्तरसम्म रहिरहनेछ। किनकी एकपछि अर्को रेकर्ड एकै खेलमा बने। १२ औं खेल चलिरहँदा लुम्बिनीले पहिले ब्याटिङ गर्दै १७१ रनको चुनौतीपूर्ण लक्ष्य सुम्पियो पोखरासामू। तर पोखराले त्यो लक्ष्य मात्र १६ दशमलव ५ ओभरमै भेट्टायो त्यो पनि विना विकेटको क्षतिमा।
१० विकेटको जित
जारी लिगमा कुनै पनि खेलमा यति ठूलो जित यो पहिलो हो। १७१ रनको लक्ष्य एक विकेट पनि नगुमाइ ३ ओभर बाँकी रहँदै भेट्नु चानचुने थिएन। तर पोखराले त्यो पूरा गरेर। एक रेकर्ड नै बनायो। त्यसअघि जनकपुरले कर्णालीमाथि ८ विकेटको जित निकालेको थियो।
ठूलो साझेदारी
लिगमा अहिलेसम्मकै ठूलो साझेदारीसमेत आजकै खेलमा बनेको छ। पहिलो विकेटका लागि १७६ रनको साझेदारी बनेको छ। पोखरा एभेन्जर्सका ओपनरद्वय आन्द्रे गौस र दिनेश खरेलले यति ठूलो साझेदारी गरेका हु्न्।
गौसले नटआउट १०४ रनको शतकीय पारी खेले। जहाँ उनले ५४ बलमा १२ चौका र पाँच छक्का प्रहार गरे। यस्तै उनका सारथी दिनेश खरेलले नटआउट ६१ रनको अर्धशतकीय पारी खेले। उनले पनि ४६ बलमा चार चौका र चार छक्का प्रहार गरे।
यसअघि पहिलो विकेटका लागि जनकपुर बोल्ट्सका अनिल शाह र आसिफ शेखले कर्णाली याक्स विरुद्ध पहिलो विकेटका लागि ८४ रनको साझेदारी गरेका थिए।
सबैभन्दा छिटो अर्धशतक
लिगमा सबैभन्दा छिटो अर्धशतकको रेकर्ड पनि ब्रेक भएको छ। सुदूरपश्चिमका कप्तान दीपेन्द्र सिंह ऐरीको यो रेकर्डलाई आज पोखराका गौसले तोडे।
उनले मात्र २० बलमा अर्धशतक बनाए। ऐरीले विराटनगर किङ्सविरुद्ध २३ बलमा अर्धशतक प्रहार गरेका थिए।
पहिलो शतक
आजसम्म जम्मा १२ खेल सम्पन्न भएकोमा अर्धशतकहरु धेरै प्रहार भए पनि शतक प्रहार गर्न कसैले सकेको थिएन। तर आज त्यो पनि भएको छ।
गौसले पोखराका लागि एनपीएलमा पहिलो शतक प्रहार गरे। मात्र ५४ बलमै १२ चौका र पाँच छक्काको प्रहार गर्दै शतक बनाए।
यसअघि पहिले ब्याटिङ गरेको लुम्बिनीका कप्तान रोहित पौडेलले नै लिगमा सबैभन्दा धेरै ९५ रन बनाएका थिए। साथै लिगमा एकै खेलमा शतकसँगै अर्धशतकसमेत बनेको यो पहिलो खेल हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
