काठमाडौं– नेपाल क्रिकेट संघ (क्यान)ले पहिलोपटक आयोजना गर्न लागेको नेपाल प्रिमियर लिग नजिकिँदै छ। प्रतियोगिता हुने समायावधि नजिकिँदै गर्दा यता टिमहरुले विदेशी खेलाडीहरुलाई पनि धमाधम भित्र्याइरहेका छन्।
सबैभन्दा धेरै पोखरा एभेन्जर्सले अहिलेसम्म तीन जना विदेशी खेलाडी भित्र्याइसकेको छ। जसमा वेस्टइन्डिजबाट एन्डरसन फिलिप, नेदरल्यान्ड्सका बास डे लिडे र अमेरिकाका आन्द्रिएस गौस रहेका छन्।
यस्तै काठमाडौं गुर्खाजले पनि नेदरल्यान्ड्सका माइकल लेभिटलाई अनुबन्ध गरेको छ। कर्णालीले पाकिस्तानका अलराउन्डर हुसैन तलत, सुदूरपश्चिमले स्कटल्यान्डका ब्रान्डन मक्मलेन, लुम्बिनी लायन्सले इंग्ल्यान्डका टम मोरिस र विराटनगर किंग्सले ओमानका अकिब इल्यासलाई एनपिएलका लागि अनुन्ध गरेका छन्।
नेपालभित्र आयोजना हुने फ्रेन्चाइजमध्ये ठूलो र भव्य हुन लागेको एनपिएलका लागि यसअघि नै घरेलु खेलाडीहरुलाई अक्सनमार्फत छनोट गरिएको छ। यता विदेशी खेलाडीको हकमा भने एक टिमले चार जनासम्म राख्न पाउनेछन्।
अन्यत्र पनि लिगहरु भइरहेकाले पूरा खेल अवधिका लागि खेलाडी नपाइएको खण्डमा एक वा दुई खेलका लागि मात्र विदेशी खेलाडी आउन सक्ने अवस्थालाई मध्यनजर गर्दै आईसीसीले ६ जनासम्म विदेशी खेलाडी अनुबन्ध गर्नका लागि छुट दिएको छ।
प्रतियोगिता नजिकिँदै गर्दा टोलीहरुले एक पछि अर्को गर्दै विदेशी खेलाडीहरु भित्र्याइरहेका छन्। आठ टोलीको सहभागिता रहेको एनपिएल आगामी मंसिर १५ देखि पुस ६ गतेसम्म टियू मैदानमा आयोजना हुनेछ।
यी हुन् अहिलेसम्म अनुबन्ध भएका विदेशी खेलाडीहरु
पोखरा एभेन्जर्स : आन्द्रिएस हाउस (अमेरिका), एन्डरसन फिलिप (वेस्ट इन्डिज), बास डे लिडे (नेदरल्यान्ड्स)
कर्णाली याक्स : हुसेन तलत (पाकिस्तान)
लुम्बिनी लायन्स : टम मोरिस (इंग्ल्याण्ड)
सूदुरपश्चिम रोयल्स : ब्रान्डन मक्मलेन (स्कटल्याण्ड)
विराटनगर किंग्स : अकिब इल्यास (ओमान)
काठमाडौं गुर्खाज : माइकल लेभिट (नेदरल्यान्ड्स)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
