काठमाडौं – दशैंको फूलपातीको दिन पारेर तीन ठूला घरेलु फिल्म ‘छक्का पञ्जा ५’, ‘ज्वाइँ साब’ र ‘१२ गाउँ’को बक्स अफिस प्रतिस्पर्धा सुरु भएको छ।
यो त्रिपक्षीय भिडन्तलाई यस वर्षकै सबैभन्दा ठूलो मानिएको छ। तीनवटै फिल्ममा बलियो ‘स्टारकास्ट’छ भने प्रचार सामाग्रीले पनि राम्रो ‘हाइप’ निर्माण गरेका छन्। अब व्यापारमा कुन फिल्मको पल्ला भारी हुन्छ, त्यो मात्र पखाईको विषय हो।
यी तीन फिल्ममध्ये सर्वाधिक सोज भने फ्रेन्चाइज फिल्म भएकाले ‘छक्का पञ्जा ५’ले पाएको छ। यसलाई देशभर लगभग ३ सय सोज मिलेको छ। र, उपलब्ध अधिकांश सोजको उल्लेख्य मात्रामा टिकट बिक्री भएको छ। धेरै सोज त ‘सोल्डआउट’ भइसकेका छन्। बिहीबार बिहानैदेखि ‘डोरसेल’ पनि राम्रो देखिएको छ। यसरी हेर्दा फिल्मले आक्रामक ओपनिङ गर्ने निश्चित प्रायः छ।
सरकारी कार्यालयमा व्याप्त भ्रष्टाचारको कथामा तयार भएको ‘छक्का पञ्जा ५’लाई दीपाश्री निरौलाले निर्देशन गरेकी हुन्। उनको यो चौंथो निर्देशित फिल्म हो। दीपकराज गिरी, केदार घिमिरे, वर्षा सिवाकोटी, निर्मल शर्मा, राजाराम पौडेल लगायतको अभिनय रहेको फिल्ममा आर्यन सिग्देल केमियो भूमिकामा छन्। यसका अघिल्ला चारवटै श्रृंखला व्यावसायिक रुपमा सफल भएका थिए।
सोज संख्यामा दोस्रो स्थानमा रहेको विराज भट्ट निर्देशित फिल्म ‘१२ गाउँ’को पनि अग्रिम बुकिङमा राम्रो क्रेज देखियो। फिल्मलाई प्राप्त धेरै सोजको ८० प्रतिशत टिकट रिलिजको अघिल्लो दिन नै बिक्री भइसकेका थिए। ‘डोरसेल’ पनि राम्रो देखिएकाले फिल्मले सुखद ओपनिङ गर्ने देखिन्छ। विशेषगरी सिंगल थिएटरमा फिल्मले राम्रो कमाई गर्ने प्रक्षेपण गरिएको छ।
‘१२ गाउँ’बाट विराजका छोरा समीरले अभिनेताको रुपमा डेब्यु गरेका छन्। यो फिल्मबाट उनी ‘स्टार’को रुपमा उदाउन सक्ने कतिपयको विश्लेषण छ। तर, त्यसका लागि फिल्मको सफलता अनिवार्य रहनेछ। र, उनले अभिनयमा पनि आफूलाई प्रमाणित गर्नुपर्नेछ। विराज स्वयंको पनि मुख्य भूमिका रहेको यो फिल्मबाट अभिनेत्रीमा न्यान्सी खड्का र सनिशा भट्टराईले डेब्यु गरेका छन्। फिल्म एक्सनप्रधान र सामाजिक कथावस्तुमा निर्माण भएको छ।
बसन्त निरौला निर्देशित ‘ज्वाइँ साब’ भने सोज संख्या र अग्रिम बुकिङ दुवैमा तेस्रो स्थानमा छ। देशभर लगभग एक सय हाराहारी सोज पाएको फिल्मलाई बक्स अफिसमा आफ्नो पकड बनाउन बलियो ‘वर्ड अफ माउथ’को आवश्यकता पर्नेछ। र, यसमा निर्माण टिम विश्वस्त छ। ‘कसम बत्तीको’ गीतका कारण चर्चामा रहेको फिल्ममा जितु नेपाल र नीति शाह मुख्य भूमिकामा छन्।
‘ज्वाइँ साब’को कथावस्तु रोचक देखिएको छ। विवाहपछि बेहुलाको घरमा बेहुली भित्रने चलन रहेकोमा फिल्मले बेहुलीको घरमा बेहुला भित्रिएको कथा उठाएको छ। यसले गर्दा पनि फिल्मप्रति दर्शक आकर्षित हुनसक्ने सम्भावना देखिन्छ। यसमा प्रकाश घिमिरे, रमेश बुढाथोकी, बुद्धि तामाङ, हिमेश पन्त, शिवु पाण्डे लगायतको पनि अभिनय छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
