काठमाडौं – यही बिहीबार (फूलपाती)बाट तीन नेपाली फिल्म ‘ज्वाइँ साब’, ‘१२ गाउँ’ र ‘छक्का पञ्जा ५’ एकसाथ प्रदर्शनमा आउने तयारीमा छन्।
यो त्रिपक्षीय भिडन्तलाई यस वर्षकै सबैभन्दा ठूलो मानिएको छ। तीनवटै फिल्मको ‘स्टारकास्ट’ र चर्चा हेर्दा यसपटक बक्स अफिसमा टक्करको प्रतिस्पर्धा हुने देखिन्छ। सोमबारबाट यी तीन फिल्मको मल्टीप्लेक्सहरुमा अग्रिम बुकिङ खुला भैसकेको छ।
सोज संख्यामा ‘छक्का पञ्जा ५’ अन्य दुई फिल्मभन्दा धेरै अगाडि छ। देशकै ठूलो मल्टीप्लेक्स चेन क्यूएफएक्समा मात्र फिल्मले कूल ९० सोज पाएको छ। बुधबार साँझसम्म क्यूएफएक्समै फिल्मले एक सय सोज नघाउने सम्भावना प्रवल छ।
यस्तै, काठमाडौंका आईएनआई, वान् सिनेमाज्, बिग मुभिज, बिएसआर मुभिज्, एफक्यूब, रञ्जना सिनेप्लेक्ससहित उपत्यकाबाहिरका मल्टीप्लेक्सहरुले पनि फिल्मलाई उच्च सोज बाँडेका छन्।
सरसर्ती हेर्दा फिल्मले पहिलो दिन देशभर ३ सय हाराहारी सोज पाउन सक्ने देखिन्छ। यो संख्या आक्रामक ओपनिङका लागि पर्याप्त छ। अब प्राप्त सोजलाई अकुपेन्सीमा बदल्नुपर्ने चुनौती फिल्मलाई रहनेछ। यसका अघिल्ला चारवटै श्रृंखला सफल भएकाले ‘छक्का पञ्जा ५’ले पनि बक्स अफिसमा ठूलो अंक जोड्न सक्ने प्रक्षेपण गरिएको छ।
सोज संख्याको आधारमा ‘१२ गाउँ’ भने दोस्रो स्थानमा छ। क्यूएफएक्स चेनमा फिल्मले कूल ५३ सोज पाएको छ। देशका अन्य मल्टीप्लेक्ससहितको सोज जोड्ने हो भने डेढ सय पुग्छ। यो सोज संख्यालाई राम्रो मान्न सकिन्छ। केही मल्टीप्लेक्समा एड्भान्स बुकिङ पनि उत्साहजनक देखिएको छ। विशेषगरी काठमाडौंको एफक्युबमा फिल्मको ठूलो मात्रामा टिकट बिक्री भैरहेको छ।
त्यस्तै, ‘ज्वाइँ साब’ सोज संख्यामा तेस्रो स्थानमा छ। फिल्मले पहिलो दिन देशभर एक सय हाराहारी सोज पाउने देखिएको छ। क्यूएफएक्स चेनमा फिल्मलाई कूल ४० सोज प्राप्त छ।
फूलपातीका तीन नेपाली फिल्मले गर्दा अघिल्लो हप्ता आएको हलिउडको ठूलो फिल्म ‘जोकर २’लाई बिहीबारबाटै उतारिँदैछ। त्यसो त नेपालमा यो फिल्मको व्यापार नाजुक छ।
गत हप्ताको बिहीबार (घटस्थापना)बाट प्रदर्शनमा आएको ‘बेहुली फ्रम मेघौली’ले भने फूलपातीको दिन देशभर ५० हाराहारी सोज ‘होल्ड’ गर्ने देखिन्छ। फूलपातीको भोलिपल्ट (शुक्रबार) बलिउड अभिनेत्री आलिया भट्ट स्टारर फिल्म ‘जिग्रा’ रिलिज हुन लागेकाले यसलाई पनि मल्टीप्लेक्सहरुले राम्रो सोज उपलब्ध गराएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
