काठमाडौं-आईसीसी विश्वकप लिग-२ मा नेपाल ओमानसँग १ विकेटले पराजित भएको छ । लिग २ को त्रिकोणात्मक एक दिवसीय सिरिजका लागि क्यानडा भ्रमणमा रहेको नेपालको यो लगातार दोस्रो हार हो ।
पहिलो खेलमा नेपाल क्यानडासँग पराजित भएको थियो । गुलशन झाले पाँच विकेट लिनुका साथै ब्याटिङमा आक्रामक अर्धशतकसहित सानदार अलराउण्ड प्रदर्शन गरे पनि नेपालको हार टार्न सकेनन् । यस खेलमा नेपालले ३ खेलाडी परिवर्तन गरेको थियो ।
मपल लिफ नर्थ वेष्ट क्रिकेट ग्राउण्ड, किंग सिटीमा ओमानले टस जितर फिल्डिङ रोजेको थियो । सुरुवाती ब्याटिङ गरेको नेपालले निर्धारित ५० ओभरमा ९ विकेट गुमाउँदै २ सय २० रन बनाएको थियो । नेपालको शीर्षक्रमले यस खेलमा पनि उत्कृष्ट्र प्रदर्शन गर्न सकेन । कुशल भुर्तेलको स्थानमा ओपनिङमा आएका अर्जुन साउँद ५ रनमा बाहिरिए । कलिमुल्लाहले अर्जुनलाई आउट गर्दै आमानलाई अर्ली ब्रेक थ्रु दिलाएका थिए ।
असिफ सेख पनि लामो समय पिचमा टिक्न सकेनन् । उनी व्यक्तिगत ११ रनमा शोएब खानको सिकार भए । भिम सार्की पनि ११ रनमा बाहिरिए । भीमको विकेटसँगै नेपाल १३ ओभर १ बलमा ३१ रनमा ३ विकेट गुमाएको खराब अवस्थामा थियो । त्यसपछि चौथो विकेटका रुपमा आरिफ सेख र कप्तान रोहित पौंडेलले ८३ रनको महत्वपूर्ण साझेदारी गर्दै नेपाललाई अघि बढाए ।
यस सिरिजमा पहिलो पटक मौका पाएका आरिफले प्राप्त अवसरको उपयोग गर्दै ३५ रनको योगदान दिए । रोहितले ७२ बलमा २ चौका र ४ छक्कासहित सर्वाधिक ६० रनको इनिङ खेले । अनिल साह ३ रनमा आउट भए । गुलशनले ३५ बलमा ३ चौका र ५ छक्काको मद्दतमा ५३ रनको आक्रमक इनिङ्स खेले । करण केसी १ र सोमपाल कामीले २० रनको योगदान दिए । सन्दीप लामिछाने १५ बलमा ११ रन जोडे । ओमानका कलिमुल्लाह, फयाज बट, अकिब इलियासले २-२ विकेट लिए । सकिल अहमद र शोएब खानले १-१ विकेट लिए ।
२ सय २१ रनको लक्ष्य पछ्याएको ओमानले ४९ दशमलव ५ ओभरमा ९ विकेट गुमाउँदै पूरा गर्यो । ओमानलाई ओपनर कश्याप प्रजापति र जतिन्दर सिंहले ७५ रनको साझेदारी गर्दै राम्रो सुरुवात दिए । सन्दीपले जतिन्दरलाई एलबीडब्लू आउट गर्दै नेपाललाई पहिलो सफलता दिलाए । कश्याप ३६ रनमा आउट भए । जतिन्दर सिंहले सर्वाधिक ४१ रनको योगदान दिए ।
सकिल अहमत १७ रनमा नटआउट रेह । अन्तिम ओभरमा ओमानलाई जितका लागि ८ रन आवश्यक थियो तर सोमपाल कामीले त्यसलाई रक्षा गर्न सकेनन् । नेपालका लागि गुलशनले ५ विकेट लिए । करणको नाममा २ विकेट रह्यो ।
नेपाल पहिलो खेलमा क्यानडासँग १ सय ३ रनले पराजित भएको थियो । नेपालले अब आइतबार क्यानडा र मंगलबार ओमानसँग खेल्नेछ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1764146706.png)
