काठमाडौं- त्रिभुवन विश्व विद्यालय अर्थशास्त्र विद्यार्थी समाज(इकोस) अर्थशास्त्र केन्द्रिय विभागले आउँदै गरेको मौद्रिक नीतिबारे छलफल गरेको छ।
अर्थतन्त्रका विद्यमान समस्यालाई मौद्रिक नीतिबाट कसरी समाधान गर्ने भन्ने विषयमा अन्तरक्रिया कार्यक्रम आयोजना गरिएको अर्थशास्त्र विद्यार्थी समाजका उपाध्यक्ष प्रविन श्रेष्ठले बताए।
कार्यक्रममा बोल्दै नेपाल उद्योग वाणिज्य महासंघकी पूर्वअध्यक्ष भवानी राणाले अर्थतन्त्रमा नीजि क्षेत्रको आत्मबल बढाउने नीति आवश्यक रहेको बताइन्।
उद्योगीहरूले पूर्ण क्षमतामा सञ्चालन हुन नसकेको तथा ऋण तिर्न नसकेर कतिपय उद्योगी आत्महत्या गरेका जस्ता जटिल अवस्था देखिन थालेको औंल्याउँदै उनले अबको नीति उत्पादन बढाउने तथा उद्यमीको रक्षा गर्ने खालको हुनुपर्ने उल्लेख गरिन्।
पूर्वबैंकर अनलराज भट्टराईले बित्तीय क्षेत्रको संवेदनशीलतालाई ख्याल गरेर नीति बनाउनुपर्नेमा जोड दिए। राष्ट्र बैंकका पूर्वकार्यकारी निर्देशक नरबहादुर थापाले अहिलेको समय धेरै चुनौतीपूर्ण रहेको उल्लेख गरे।
बैंकमा जम्मा भएको बचतलाई भरपर्दो लगानीमा रूपान्तरण गर्नुपर्ने बताए। अहिलेको तरलतालाई व्यवस्थापन गर्ने नाममा जथाभावी खर्च गर्दा भयावह अवस्था आउने सक्ने हुँदा संयमित हुनुपर्ने उनको भनाइ छ।
प्रा.डा रामप्रसाद ज्ञवाली ज्ञवालीले मुलुकको अर्थतन्त्रमा लगानीमा कमी, खस्कँदो आन्तरिक उत्पादन र बित्तीय बजारको अन्योलले ठूलो समस्या पारेको बताए। यस्तो अवस्थालाई मौद्रिक नीतिसँगै प्रभावकारी वित्तीय नीतिको संयोजनमार्फत समाधान गर्नुपर्नेमा जोड दिए।
नेपालको मौद्रिक नीति बनाउदा वा ब्याजदर तय गर्दा भारतको नीति पनि ख्याल गर्नुपर्ने बताए। ख्याल नगरे पुँजी पलायनको समस्या हुने उनको तर्क छ। कीर्तिपुरस्थित त्रिवीको सेडा हलमा सम्पन्न उक्त अन्तरक्रिया कार्यक्रममा उद्योग वाणिज्य महासङ्घकी पूर्व अध्यक्ष भवानी राणा, पूर्वबैंकर अनलराज भट्टराई, राष्ट्र बैंकका पूर्वकार्यकारी निर्देशक नरबहादुर थापा र अर्थशास्त्र केन्द्रिय विभागका विभागीय प्रमुख प्रा डा राम प्रसाद ज्ञवालीको सहभागीता थियो। विद्यार्थी र प्राध्यापकहरूको समेत बाक्लो उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
