काठमाडौं– कान्ति बाल अस्पतालको शल्यचिकित्सा विभागले शल्यक्रियामा लाग्ने शुल्कसहितको विवरण सूचना पाटीमा प्रकाशित गरेको छ। उक्त सूचना पाटीमा अस्पतालमा गरिने विभिन्न प्रकारका शल्यक्रियालाई वर्गीकरण गरी उक्त शल्यक्रियामा लाग्ने शुल्क समेत समावेश गरिएको छ।
अस्पतालले जारी गरेको उक्त सूचना पाटी अनुसार शल्यक्रियालाई विभिन्न ८ प्रकारमा विभाजन गरिएको छ । जसमा माइनर ए, माइनर बी, इंटरमीडिएट ए, इंटरमीडिएट बि, मेजर ए, मेजर बि, भेरी मेजर ए, भेरी भेजर बी पर्छन्। यी ८ प्रकारका शल्यक्रिया अन्तर्गत विभिन्न ७८ वटा शल्यक्रिया प्रक्रियाको शुल्क उल्लेख छ।
कान्ति बाल अस्पतालका शल्य चिकित्सा विभाग प्रमुख डा विजय थापाका अनुसार सर्वसाधारणको जानकारीका लागि उक्त सूचना दुई साता अगाडि मात्रै अस्पतालले सूचना पाटीमा राखेको हो।
अस्पतालले जारी गरेको उक्त सूचनामा शल्यक्रिया शुल्क मात्रै निर्धारण गरिएको हो, जसमा अन्य प्रकारका शुल्क समावेश नगरिएको उनले बताए।
शल्यक्रियाका क्रममा प्रयोग हुने अन्य सामग्रीहरु बिरामी आफैंले किन्नुपर्ने उनले बताए। शल्यक्रियाका क्रममा प्रयोग हुने सुईं, धागो लगायतका सामग्रीहरु बिरामीले आफैं किन्नुपर्ने छ।
शल्यक्रियाको वगीकरण कसरी गरियो, कति लाग्छ शुल्क?
सामान्य पिलो चिर्ने, ड्रेसिङ गर्ने जस्ता शल्यक्रिया माइनर अन्तर्गत पर्ने उनले बताए। जसमा माइनर ए को १ हजार ८०० रुपैयाँ र बी को ३ हजार रुपैयाँ शुल्क निर्धारण गरिएको छ ।
इंटरमीडिएट सर्जरीमा हर्निया, अण्डकोषको शल्यक्रिया जस्ता सर्जरी पर्नेछन्। जसमा ६ हजार रुपैयाँ र ७ हजार २०० रुपैयाँ शुल्क निर्धारण गरिएको छ।
त्यस्तै मेजर सर्जरी अन्तर्गत ऐपेन्डिक्स, पेट खोलेर गर्ने शल्यक्रिया पर्छन्। जसमा शल्यक्रियाको १२ हजार रुपैयाँ र १४ हजार ४०० रुपैयाँ शुल्क निर्धारण गरिएको छ।
त्यस्तै कुनै बिरामीमा दिसा गर्ने प्वाल नै नहुने, मिर्गौलामा भएका क्यान्सर हुँदा गरिने शल्यक्रिया भेरी मेजर शल्यक्रिया पर्ने डा थापा बताउँछन्। यस्ता शल्यक्रियाको शुल्क १८ हजार रुपैयाँ र २१ हजार ६०० निर्धारण गरिएको छ।
निजीको तुलनामा १० प्रतिशतसम्म सस्तो शल्यक्रिया
निजी अस्पतालले लिने शल्यक्रिया शुल्कभन्दा कान्ति बाल अस्पतालको शुल्क ५ देखि १० प्रतिशतसम्म सस्तो रहेको डा थापाको दाबी छ। 'कान्ति बाल अस्पतालमा ५ देखि ७ हजारसम्ममा हुने हर्नियाको शल्यक्रिया निजी अस्पतालमा गराउनुपर्दाे ५० हजारसम्म खर्च हुने गर्छ, त्यस्तै हामीले १२ हजारमा गर्ने एपेन्डिक्सको शल्यक्रिया बाहिर गराउँदा न्यूनतम नै ५० हजार खर्च हुन्छ,' डा थापाले भने।
विगत २ वर्ष अगाडिसम्म शल्यक्रियाका लागि आवश्यक पर्ने सामग्रीहरु समेत अस्पतालले उपलब्ध गराउँदै आएकोमा अहिले भने त्यो व्यवस्था छैन।
बजेट अभावका कारण उक्त सेवा बिरामीलाई दिन नसकिएको डा थापाले बताए।
हेरौं शुल्कको विस्तृत विवरण
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
