काठमाडौँ- काठमाडौं महानगरपालिकाले घरवहाल कर लगायतको बजार अनुगमनलाई तीब्र पारेको छ। वैशाख २१ गतेबाट सुरु भएको महानगरको घरवहाल कर लगायतको बजार अनुगमन आजसम्म पनि जारी छ।
महानगरपालिकाको राजश्व विभागले ‘अनुगमन टोली परिचालन कार्यक्रम २०८०’ अभियानको रुपमा तीन प्रकारका राजश्व अनुगमन टोलीको व्यवस्था गरेर बजारमा परिचालन गरेको हो। महानगरले जनप्रतिनिधि, कर्मचारी, राजश्व विभाग कर्मचारी सहितको टोलीले पसल तथा कम्प्लेक्सहरुमा घरबहाल कर र महानगरलाई तिर्नुपर्ने कर तिरे/नतिरेकोबारे अनुमगन गरेका हुन्।
महानगरले कर बुझाउने करदातालाई धन्यवाद दिने र कर नबुझाउने करदातालाई कर तिर्न आग्रह गर्ने अभियान चलाएको बताएको छ। महानगरको टोलीले न्युरोड क्षेत्रमा अनुगमन गरेको हो।
अनुगमनको क्रममा व्यवसाय दर्ता भए पनि नवीकरण नगरेको र घरबहाल करमा समस्या देखिएको काठमाडौं महानगर राजश्व विभागका राजश्व अधिकृत रामजी श्रेष्ठले बताए। उनले नेपाल सरकार र महानगरलाई पनि घरबहाल कर तिर्नुपर्ने भएकाले समस्या देखिएको जानकारी दिए।
उनले घर भाडा तिरेको बहाल कर तिर्ने रकम फरक पाइएकाले महानगरपालिकाले विचार गर्नुपर्ने देखिएको उल्लेख गर्दै वास्तविक भाडा अनुसार घरबहाल करको मापदण्ड बनाउन जरुरी रहेको बताए।
श्रेष्ठले भने, ‘यथार्थ बहाल कर, व्यवसाय कर तिरेको हो कि होइन भन्ने कुरा मापन गर्न खोजेका हौँ। यताउता फरक देखिएको छ। व्यवसाय त धेरै छ, नवीकरण गर्न बाँकी छ। कोही एक/दुई वटा फाट्टफुट्ट दर्ता भएको छ। उहाँहरुलाई हामीले दर्ता गर्न निर्देशन दिएका छौँ। बहाल कर ठाउँ एउटै भए पनि फरकफरक कर तिरेको भेटिएको छ। महानगरले बहाल करको मापदण्ड बनाइदिए व्यवसायीहरुले तिरेर जाने कुरा बताउनुभएको छ। मापदण्ड बनाउनुपर्छ एउटै भन्ने उहाँहरुको माग छ।’
महानगरपालिकाले बहाल करलाई व्यवस्थित गर्न तथा बहाल लिने र दिने बीचका सर्त व्यवस्थापन गर्न ‘बहाल व्यवस्था कार्यविधि’ समेत जारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
