मुम्बई-कयौं सिनेमामा आफ्नो समयका उत्कृष्ट अभिनेत्रीहरुले साथसाथ काम गरेका छन्। तर यी अभिनेत्रीका बीच मित्रता नै हुन्छ भन्ने छैन। उनीहरुका दुश्मनीका किस्सा हुन्छन् र संचारमाध्यममा तिनैले धेरै स्थान पाउने गरेका छन्।
बलिउड अभिनेत्रीका दुश्मनीका कुरा सँधै चर्चामा रहने गरेका छन्। तर रोचकचाहिँ के छ भने एकदमै दुश्मन भनिएका उनीहरुले कयौंपटक एकै सिनेमामा सँगसँगै काम गरेको पाइन्छ।
हामीले यहाँ यस्तै एउटा घटनाको चर्चा गर्दैछौं, जहाँ निर्देशकले यी दुबै अभिनेत्री एकापसमा बल्दैनन् भनेर आफ्नो सिनेमाको सुटिङका दौरान एकै खम्बामा बाँधिदिएका थिए।
घटना सन् १९९४ मा रिलिज भएको 'अन्दाज अपना-अपना' सिनेमाको हो। राजकुमार सन्तोषी निर्देशित सिनेमामा आमिर खान, सलमान खान, रविना टन्डन, करिष्मा कपुर प्रमुख भूमिकामा छन्। उनीहरुका अलावा सिनेमामा परेश रावल तथा शक्ति कपुरको पनि भूमिका थियो।
यो सिनेमामा करिष्मा र रविनालाई साथीसाथीको भूमिकामा पेस गरिएको छ तर यो सिनेमाको सुटिङका समयमा यी दुबै अभिनेत्रीको कुनै कारणले बोलचाल बन्द थियो। उनीहरु सट दिँदा एकसाथ रहे पनि सट नहुँदा टाढै बस्थे।
उनीहरुको यो हर्कतबाट निर्देशक सन्तोषी हैरान थिए। उनले यसको उपचार आफैँ खोजे। त्यो उपचार सिनेमाको क्लाईमेक्स सिनमा समेत देख्न सकिन्छ।
आफ्ना दुई अभिनेत्री नबोल्ने चाल पाएपछि उनले स्क्रिप्टमा नभएको कुरालाई परिमार्जन गरिदिए र दुबैलाई एउटै खम्बामा बाँधिदिए। यस गरेपछि सन्तोषीले दुबैजनाबीच बोलचाल हुने अनुमान गरेका थिए।
उनले त्यतिमात्र होइन सेटमा रहेका मानिसहरुलाई दुबै जना बोलचाल गर्न नथालेसम्म उनीहरु बाँधिएको डोरी नफुकाउने आदेश दिएका थिए।
यी दुवैबीच बोलचाल नहुनुको कारण एउटा प्रेम र अर्को फिल्म रहेको बताइन्छ।
भारतीय संचारमाध्यममा प्रकाशित समाचारका अनुसार एक कारण करिष्माले रविनालाई ४ सिनेमाबाट निकाल्न भूमिका खेलेको र अर्को भने प्रेम रहेको छ। एकसमय रविना अभिनेता अजय देवगनसँग प्रेममा थिइन्। केही समयपछि उनीहरुको ब्रेकअप भयो। ब्रेकअपपछि करिष्माको नाम अजयसँग जोडियो।
यसमा पनि करिष्माको हात रहेको रविनाको बुझाइ छ।
यस्तै निर्माता र सिनेमाका नायकसँगको निकट सम्बन्धलाई दुरुपयोग गर्दै चार सिनेमाबाट आफूलाई निकालेको कुरा रविनाले ९० को दशकमा दिएको एक अन्तरवार्तामा उनले यसबारे उल्लेख गरेकी छन्।
अहिले उनीहरुबीच सार्वजनिक भेटघाटमात्र हुने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
