काठमाडौं– नेपालले एसएमएस फ्रेन्डसिप कप अन्तर्गत लिगको चौथो खेलमा गुजरातविरुद्ध चुनौतीपूर्ण लक्ष्य दिएको छ। टस हारेर पहिलो ब्याटिङको निम्तो पाएको नेपालले निर्धारित २० ओभरमा ७ विकेट गुमाउँदै १८१ रन बनायो। ओपनरद्वय आशिफ शेख र कुशल भुर्तेलको अर्धशतकीय इनिङको मद्दतले सम्मानजनक लक्ष्य दिएको हो।
नेपालका लागि ओपनर आशिफ शेखले सर्वाधिक ८५ रन बनाए। उनले ५१ बल खेल्दै १० चौका र ५ छक्का प्रहार गर्दै १८ औं ओभरमा पेभेलियन फर्किएका थिए।
नेपालको सुरुवात नै उत्कृष्ट रहेको थियो। पहिलो विकेटका लागि कुशल भुर्तेल र आशिफ शेख मिलेर १२५ रनको साझेदारी गरेका थिए। सो साझेदारी कुशल ४४ बलमा ९ चौका र २ छक्का सहित ६७ रन बनाएर १४औं ओभरमा आउट भएपछि टुटेको थियो।
ओपनर बाहेकका अन्य ब्याटर भने चल्न सकेनन्। यी दुई बाहेक अन्य कुनै खेलाडीले पनि दोहोरो अंक पुर्याउन सकेनन्। तेस्रो नम्बरमा ब्याटिङ गर्न आएका कप्तान रोहित कुमार पौडेल ७ बल खेल्दै ३ रन बनाएर १६औं ओभरमा आउट भए। त्यसपछि आएका सन्दीप जोरा र कुशल मल्ल क्रमसः २ र १ रनमा आउट भए।
अन्तिम ओभरमा थप दुई विकेट खस्यो। गुलशन झा ४ र अनिल कुमार शाह बिना कुनै रन ध्रुशान्त सोनीको शिकार बने। विवेक कुमार यादव ७ र प्रतिश जिसी ४ रनमा नटआउट रहे।
गुजरातका लागि जयमित पटेलले ३ तथा ध्रुशान्त सोनी र आर्य देसाईले समान २-२ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
