नयाँदिल्ली- विश्वका क्रिकेट प्रेमीहरुका लागि उत्सव जस्तै रहेको इन्डियन प्रिमियर लिग (आईपीएल) शुक्रबारदेखि सुरु भएको छ। शनिबार क्रिकेट प्रेमीमा बेग्लै उत्कुसुकता छ।
भारतीय स्टार विकेटकिपर ब्याटर ऋषभ पन्त दुई वर्षपछि मैदानमा उत्रिदैछन्। भारतीय समय दिउसो ३:३० बजे उनी फेरि क्रिकेट दुनियाँमा देखिनेछन्।
पन्तका प्रशंसक उनको व्यग्र प्रतिक्षा गरिरहेका छन्। सानै उमेरमा ठूलो सफलता हासिल गरेका उनी भारतका लागि अर्को पुस्ताका ‘धोनी‘ थिए। धोनीबाट प्रभावित र उनीसँगै क्रिकेट सीप सिकेका पन्तले भारतमा अर्को पुस्ताका क्रिकेटको नेतृत्व गर्ने क्रिकेट विश्लेशक बताइरहेका थिए। उनले भारतका लागि तिनै फर्म्याट (टी–२०, एकदिवसीय र टेस्ट)मा खेलिसकेका थिए।
भारतलाई क्रिकेटमा अब्बल कायम राख्न ऋषभले ठूलो भूमिका खेल्ने भनेर प्रशंसा कमाइरहेकै बेला सन् २०२२ डिसेम्बर ३० मा उनी सडक दुर्घटनामा परे। दिल्लीबाट आफ्नो घर गइरहेका बेला रुडकी हाइवेमा उनी आफैंले चलाएको कार दुर्घटनामा पर्यो। र उनी नराम्ररी घाइते भए।
दुर्घटना यति भयानक थियो कि उनी सवार कार एकछिनमा ह्वारह्वार्ती बल्न थालेको थियो। उनको अहोभाग्य, सोही बाटोबाट गइरहेका बस चालक र ड्राइभरले बाहिर निकालेर समयमै अस्पतालसम्म पुर्याए।
गम्भीर घाइते ऋषभ निकै दिनसम्म अस्पतालमा भर्ना भए। धेरैवटा सर्जरी गरिए। त्यसपछि पनि उनी लामो समय चिकित्सकको निगरानीमा रहे। ऋषभले अनपेक्षित रुपमा आफूलाई निको बनाउँदै लगे। उनको जुन दोस्रो जीवन भन्दा कम थिएन।
उनलाई घाइते अवस्थामा देख्नेहरुले फेरि मैदानमा फर्किने झिनो आशासमेत राखेका थिएनन्। उनको जीवन जोगिने कुरामा शंका रहेको समयमा क्रिकेट खेल्न सक्ने अपेक्षा स्वभाविक पनि थिएन। चोट निको भएपछि उनी १४ महिना रिह्याब प्रोसेसबाट गुज्रे। लामो जाँच, चिकित्सकीय निगरानीपछि उनलाई फिट घोषणा गरिएको छ। उनी मैदानमा फर्किदैछन्।
यसअघि उनी सन् २०२३ मा दिल्लीको अरुण जेटली स्टेडियममा आफ्नो टिममलाई सपोर्ट गर्न उनी वैशाखीको सहरामा झुल्किएका थिए। ऋषभ त्यसपछि नेशनल क्रिकेट अकेडमीको मेडिकल टिमको निगरानीमा रहे। उनले त्यहाँ सकेसम्म चाँडो ठीक हुने हरप्रयास गरे।
बीचमा उनले कडा परिश्रम गरिरहेका तस्विर र भिडियोसमेत सार्वजनिक भइरहे। यसले उनी मैदानमा फर्किन आशा उनका प्रशंसकमा पलायो तर यकिन थिएन। उनी आईपीएल २०२४ का लागि २०२३ डिसेम्बरमा भएको मिनी अक्सनमा देखिए। जहाँ उनी आफ्नो फ्रेन्चाइजी दिल्ली क्यापिटल्सको अक्सन टेबलमा अन्य टिमका सदस्यसँग थिए।
त्यसपछि उनी मैदानमा आउने तयारी गरिरहेको अनुमान सत्यनजिक पुगेको थियो। अन्तत: शनिबार दिउँसो उनी मैदानमा देखिनेछन्। उनको दोस्रो जीवनको नयाँ इनिङ कसरी सुरु होला? क्रिकेट प्रेमीमा स्वभाविक रुपमा कौतुहलता छ।
उनले अहिलेसम्म ९८ आईपीएल म्याच खेलेका छन्। जहाँ उनले २ हजार ८ सय ३८ रन बनाएका छन्। २२ टेस्ट खेलेर २ हजार २ सय ७१ रन बनाएका छन्। ३० वनडे खेलेर ८६५ रन बनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
