सिन्धुपाल्चोक– जल पर्यटनलाई विकास गर्ने उदेश्यले खेलिने खेल कायाकिङ प्रतियोगिता सिन्धुपाल्चोकको भोटेकोसी नदीमा सम्पन्न भएको छ। नदीमा खेलिने कायक खेल सिन्धुपाल्चोकको भोटेकोसी नदीमा मंगलबारदेखि सुरु भएको थियो।
मंगलबारदेखि बुधबारसम्म चार विधामा प्रतियोगिता चलेको थियो। रिभर डाउन रेसमा ६ किलोमिटरको यात्रा पार गर्दै सुरेन्द्र माझी प्रथम भए भने, प्रमोद गुरुङले दोश्रो स्थान बनाउन सफल भए।
प्रतियोगिताकै अर्का प्रतिस्पर्धा गरेका कृष्ण खड्काले तृतीय स्थान हासिल गरेका छन्। त्यस्तै अर्को विधा हेड टु हेडमा प्रमोद गुरुङले प्रथम स्थान बनाए। विक्रम गुरुङ प्रतिस्पर्धामा दोस्रो भए भने, कृष्ण खड्काले तृतीय स्थान बनाए। नदीमै खेलिने अर्को खेल स्प्रीन्टमा कृष्ण खड्का पहिलो बने, त्यस्तै प्रमोद गुरुङले आफूलाई दोश्रो स्थानमा खुम्च्याए भने विक्रम गुरुङ प्रतिस्पर्धामा तृतीय भए।
त्यस्तै सललाम प्रतियोगितामा विक्रम गुरुङले आफूलाई पहिलो स्थान बनाउँदा मनोज सुनुवारले दोस्रो स्थान प्राप्त गरे भने, सन्दीप कुमाल तृतीय बन्न सफल भए। चार विधामा खेलाइएको प्रतियोगितामा ३२ जना खेलाडीले भाग लिएका हुन्। त्यसमध्ये ३ जना महिलाले खेलमा सहभागिता जनाएका थिए।
जसमा अनिता कार्कीले चार विधामा आफूलाई १ हजार अंकसहित प्रथम स्थान बनाउन सफल बनिन् भने, पविता मगर ८ सय ९३ अंक सहित द्वितीय बन्दा सम्झना माझीले ८ सय ८७ अंक तृतीय भइन्।
त्यस्तै पुरुष तर्फ समग्रमा प्रमोद गुरुङले ८ सय ८० अंक सहित प्रथम बने, त्यस्तै चार विधामै प्रतिस्पर्धा गरेका सुरेन्द्र माझीले दोस्रो स्थान बनाउँदा अर्का खेलाडी विक्रम गुरुङ तृतीय भए। खेलमा निर्णायकले समय, प्राविधिक र अनुशासनलाई हेरेर मूल्यांकन हुने गरेको भोटेकोसी एड्भेन्चर क्लबका अध्यक्ष रबिन श्रेष्ठले बताए।
सिन्धुपाल्चोकको भोटेकोसी नदी एसियाकै ७ औं स्थानमा पर्ने नदीमा पर्ने भएकोले भोटेकोसी नदीमा सिकेका र्याफ्टिङ तथा कायक गाइडलाई विदेशमा छुट्टै मान्यता दिइँदै आएको आयोजकले जनाएको छ।
बुधबार प्रतियोगिताको पुरस्कार वितरण कार्यक्रममा बोल्दै र्याफ्टिङ एसोसिएसनका महासचिव नारायण श्रेष्ठले भने, ‘भोटेकोसी नदीमा यसवर्ष पनि कायाकिङ प्रतिस्पर्धा खेल सुरु भयो, सदा झै यसपटक पनि सुकुटेमा रहेको रिसोर्टहरुले आर्थिक सहयोग जुटाएर प्रतिस्पर्धा कार्यक्रम गरेका छौं, सबैको ध्यान भलिबल, फुटबल, ब्याटमिन्टनमा जान्छ तर यो खेललाई कसैले सहयोग गरेको छैनन्।’ उनले यो प्रतिस्पर्धालाई राम्रोसँग नबुझ्दा नदीमा खेलिने यस्तो खेल क्षेत्र पछि परेको सुनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
