काठमाडौं- सत्ता गठबन्धन एक्कासि परिर्वतन भएपछि नेपाली कांग्रेसका सभापति शेरबहादुर देउवाले बदलिएको परिस्थितिवारे छलफल गर्न पूर्व पदाधिकारी र पदाधिकारीहरुलाई आफ्नो निवास बुढानीलकण्ठमा बोलाए। सोमबार बिहानै सभपतिको निम्तोपछि त्यहाँ पुगेका कांग्रेसका सबै पदाधिकारीहरु निरास देखिन्थे।
सत्ता गठबन्धन निर्माण गर्दाको सहमति समय सकिन करिब १ वर्ष बाँकी रहँदा प्रधानमन्त्री पुष्पकमल दाहाल प्रचण्डले आफूहरुको साथ छोडेर नेकपा एमालेसँग सहकार्य अघि बढाएपछि सभापति देउवा नै अचम्ममा परेका थिए।
आइतबारसम्म बैठकमा संक्रमणकालीन न्याय टुंग्याउन सहयोग मागेका प्रधानमन्त्रीले एकै रातमा साथ छोडेर काँध फेरेपछि देउवाले कसरी अघि बढ्ने भनी पार्टी पदाधिकारीलाई छलफलमा बोलाएका थिए। छलफलमा सभापति देउवाले प्रधानमन्त्री पुष्पकमल दाहाल प्रचण्डले अविश्वसनीय रुपमा गठबन्धन तोडेको बिफ्रिङ गरे।
सत्ता गठबन्धनमा कुनै दरार वा विवाद नै नआई प्रधानमन्त्रीले आफूहरुको साथ छोडेको दाबी गरेको एक पदाधिकारीले बताए। देउवाले सक्दो रुपमा आफूलाई वचाउ गर्ने प्रयास गरेका थिए। उनले नेपाली कांग्रेसका तर्फबाट सहभागी भएका मन्त्रीहरुले राम्रै गरेको र अब नयाँ रुपमा काम गर्नुपर्ने कुरा यसअघि प्रधानमन्त्री प्रचण्डसँग भएको र उक्त कुरा आफूले पार्टीमा ब्रिफिङ पनि गरेको उनले सुनाए।
‘तर आइतबार एक्कासि किन प्रधानमन्त्री एमालेसँग जान तयार हुनुभयो। हामीलाई पनि आश्चर्य र अप्रत्यासित लागेको छ,’ देउवाले भने, ‘अब नेपाली कांग्रेस प्रतिपक्षमा रहन्छ। सशक्त प्रतिपक्षको भूमिका निर्वाह गर्छ।’
उनले आफूहरुका कारण नभई प्रचण्डले एकतर्फी रुपमा गठबन्धन तोडेको भन्दै आफ्नो वचाउ गरेका थिए। तर बैठकमा पार्टी र सभापतिको भूमिकाबारे भने प्रश्न उठेको थियो। माओवादीले सत्ता गठबन्धन तोड्ने प्रयास भइरहेको कुरा किन समयमा जानकारी हुन सकेन भनी केही पदाधिकारीले प्रश्न उठाएका थिए।
त्यस्तै उनीहरुले अब मन्त्रीहरुको हकमा के गर्ने भनी सभापतिसँग प्रश्न गरेका थिए। मन्त्रीहरुको कुरा आएपछि सभापति देउवाले अलि आक्रोशित हुँदै जवाफ दिएका थिए।
‘गठबन्धन प्रधानमन्त्रीले तोड्ने, अनि हामीले किन राजीनामा दिने?,’ देउवाले भने, ‘जेजे गर्नुहुन्छ उहाँले नै गर्नुहुन्छ।’ तर माओवादीले भने नेपाली कांग्रेसका मन्त्रीहरुले प्रधानमन्त्रीलाई सहयोग नगरेकाले गठबन्धन फेर्नु परेको आरोप लगाएका छन्।
बिहान बसेको पदाधिकारी बैठकपछि माओवादी नेता देवेन्द्र पौडेलले अर्थमन्त्री सहित मन्त्रीहरुको सहयोग प्रधानमन्त्रीले नपाएको कारण नयाँ गठबन्धन बनेको दाबी गरेका थिए।
‘बैठकमा सभापतिजीले प्रधानमन्त्रीले गठबन्धन तोडेको सुनाउनुभयो। अब हामी प्रतिपक्षमा रमाउछौँ। कांग्रेसले गठबन्धन नतोडेको भन्दै सभापतिले नयाँ रणनीतिले पार्टी अघि बढ्ने बताउनुभयो,’ प्रमुख सचेतक रमेश लेखकले सभापतिको भनाइ उदृत गर्दै भने, ‘प्रधानमन्त्रीले गठबन्धन तोडेपछि हामी के गर्नु अब? हामीले गठबन्धन तोडेको भए, अब यसो गर्छौं भन्थ्यौं। अब हामी प्रतिपक्षको बेन्चमा फर्किन्छौं।’ उनले भने। गठबन्धन प्रधानमन्त्रीले तोडेको भन्दै कांग्रेसका मन्त्रीले आफैँ राजीनामा पनि नदिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
