काठमाडौं- कांग्रेससहितको सत्ता गठबन्धन पुनः भत्किएको छ। सोमबार एमाले, रास्वपा, जसपा लगायतका दल सम्मिलित नयाँ सत्ता गठबन्धन बन्न लागेको हो।
सोमबार नै नयाँ मन्त्रिपरिषद् गठन हुने एमाले उपाध्यक्ष सुरेन्द्र पाण्डेले बताएका छन्। 'आजै सरकार परिवर्तन र नयाँ मन्त्री परिषद बन्दै। सानो आकारको मन्त्रिमण्डलले आज सपथ लिनेछ', पाण्डेले सामाजिक सञ्जालमा लेखेका छन्।
अघिल्लो वर्ष पुस १० अघिसम्म कांग्रेस, माओवादी केन्द्र लगायतका दल सम्मिलित गठबन्धन थियो। तर सो गठबन्धनबाट प्रधानमन्त्री बन्न नसक्ने भएपछि माओवादी केन्द्रका अध्यक्ष पुष्पकमल दाहाल प्रचण्डले त्यही दिन एमालेसँग नयाँ गठबन्धन निर्माण गरी प्रधानमन्त्री नियुक्त भएका थिए।
तर लगत्तै प्रचण्डले एमाले लगायतका दल सहभागी सो गठबन्धन भत्काएर कांग्रेससँगकै गठबन्धन ब्युँत्याएका थिए। सोही अनुसार राष्ट्रपतिमा रामचन्द्र पौडेल निर्वाचित हुने परिस्थिति बनाएका थिए।
एमालेसँगको गठबन्धन भत्किएको एक वर्ष पुग्दै गर्दा प्रचण्डले पुनः कांग्रेससँगको गठबन्धन भत्काएका हुन्। नयाँ गठबन्धन निर्माणका लागि आइतबार साँझ प्रधानमन्त्री निवास बालुवाटारमा प्रधानमन्त्री प्रचण्ड, एमाले अध्यक्ष केपी शर्मा ओली, रास्वपा सभापति रवि लामिछाने, जसपा अध्यक्ष उपेन्द्र यादव लगायतले छलफल गरेका थिए। त्यहाँ भएको सहमतिलाई आज आ-आफ्नो बैठक बोलाएर ब्रिफिङ गरिएको थियो।
रास्वपा बैठकमा सहभागी एक पदाधिकारीका अनुसार लामिछानेले सत्ता गठबन्धन परिवर्तन हुने ब्रिफिङ गरेका थिए। 'गठबन्धन परिवर्तन हुने जस्तो देखियो। तर अन्तिम निष्कर्ष निस्किएको छ। थप छलफलहरू जारी छ', ती नेताले भने।
यसैबीच एमालेले तत्काललाई पदम गिरीलाई मन्त्रिपरिषद्मा पठाउने भएको छ। सोमबार बिहान बसेको सचिवालय बैठकले त्यसबारे निर्णय गरेको हो।
रास्वपा बैठकमा लामिछानेले गरेको ब्रिफिङ अनुसार, नयाँ गठबन्धन निर्माणका लागि भइरहेको प्रारम्भिक छलफलमा सभापति लामिछानेलाई उपप्रधान तथा गृह मन्त्रालय दिने भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
